دامەزراوەی سەرۆك جەلال تاڵەبانی بەهاوكاری زانكۆی پۆڵیتەكنیك بۆردێكی زانستی دروست دەكات

وێنە: دامەزراوەی سەرۆك جەلال تاڵەبانی

ئەمڕۆ رێكەوتی 2023/1/18 پ.ی.د.هوشیار عەبدوڵڵا عەزیز سەرۆكی زانكۆی پۆلیتەكنیكی سلێمانی لە سەرۆكایەتی زانكۆ پێشوازی لە باڵیۆز د.محەمەد سابیر سەرۆكی دامەزراوەی سەرۆك جەلال تاڵەبانی و یوسف زۆزانی جێگری سەرۆكی دامەزراوەكە و وەفدێكی دامەزراوەكە كرد.

لە دیدارەكەدا سەرۆكی زانكۆ بەناوی خۆی و ئەنجومەنی زانكۆوە بەخێرهاتنی وەفدی میوانی كرد و ئامادەیی زانكۆی دەربڕی لەڕووی زانستی و ئەكادیمییەوە بۆ هەر هاوكاری و پشتیوانییەك بۆ دامەزراوەی سەرۆك جەلال تاڵەبانی، هەروەها باسی لە گرنگی دامەزراوەكە كرد و داوای كرد گرنگی بە بواری ئەكادیمی و زانستی و توێژینەوە بدرێت و دەزگاكە ببێتە هۆكاری زیاتر پشتیوانی ناوەندە زانستییەكان و زانكۆ و پەیمانگاكان.

لە بەشێكی دیكەی دیدارەكەدا باڵیۆز د.محەمەد سابیر سەرۆكی دامەزراوەی سەرۆك جەلال تاڵەبانی سوپاسی سەرۆكی زانكۆ و ئەندامانی ئەنجومەن و ستافی زانكۆی كرد بۆ ئەو پەرۆشی و پێشوازییە گەرمەیان بۆ رێكخراو دا‌مەزراوەكان و كاری پێكەوەیی هەماهەنگی و زیاتر وتی: "ئێمە مەبەستمانە بۆردێكی زانستی دروست بكەین، بەپێی پلان و نەخشە رێگایەكی داڕێژراو، بۆ ئەو مەبەستە داوای هەماهەنگی و هاوكاریتان لێدەكەین و داوا دەكەین لەو بۆردە زانستییەدا هاوكار و پشتیوان بن و ئەندام و نوێنەری چالاك و خاوەن ئاستی ئەكادیمی و زانستی بەرز دیاری بكەن تاوەكو لەگەڵماندا برەوی زیاتر بە بوارە ئەكادیمییەكە بدەین".

سەرۆكی زانكۆ و سەرۆكی دامەزراوەی سەرۆك جەلال تاڵەبانی  هاوڕابوون لەسەر خزمەتكردن و هەماهەنگی كردن بۆ دامەزراوەكە كە خزمەتكردنە بە خەباتی ئەكادیمی و زانستی سەرۆك مام جەلال كە رۆڵی كاریگەری هەبووە لە خزمەتكردن بە زانكۆكان و بواری توێژینەوە و پێشخستنی ئاستی زانستی ناوەندە زانستییەكان و دابینكردنی پێداویستییەكان و دەستگیرۆیی كردنی توێژەران و ئەكادیمیان.

لەكۆتایی دیدارەكەدا سەرۆكی زانكۆ داوایكرد لە رێگەی دامەزراوەی سەرۆك جەلال تاڵەبانی-ەوە رۆڵی زیاتر بە خۆێندكارانی زانكۆكان بدرێت و هاوكاری داهێنانەكانیان بكرێت، چونكە چینی خوێندكاران رۆڵەی دواڕۆژی بەڕێوەبەردنی وڵات و بەدیهنانی خۆشگوزەرانین بۆ  كۆمەڵگە.

PUKMEDIA