رەوتی حیکمە داکۆکی لە داواکاریەکانی خەڵکی هەڵەبجە دەکات

سالار سەرحەد لێپرسراوی بۆردی پەیوەندییە کوردستانییەکانی یەکێتیی نیشتمانیی کوردستان لەگەڵ باهر سابیر ئەندامی مەکتەبی پەیوەندییەکان پێشوازی کرد لە وەفدێکی باڵای ڕەوتی حیکمە و نوێنەری تایبەتی سەماحەتی عەممار حەکیم سەباح ساڵحی، کە سەردانی پارێزگای هەڵەبجەیان کرد .

وەفدی میوان لەگەڵ ئازاد تۆفیق پارێزگاری هەڵەبجە کۆبوونەوە ونوێنەری تایبەتی سەماحەتی عەممار حەکیم، جگە لە گەیاندنی پەیامی هاوسۆزی بۆ هەڵەبجە و کەسوکار و قوربانیانی کیمیابارانی هەڵەبجە، دووپاتی کردەوە کە ڕەوتی حیکمە لە پشتی هەموو داواکاری خەڵکی هەڵەبجەیە لە حکومەتی ناوەندی و ئەنجومەنی نوێنەرانی عیراق.

وتیشی: خەم و داخوازی هەڵەبجەییەکان خەم و داخوازی هەموو گەلی عیراقە، بۆیە بێ هیچ دوودڵییەک ڕەوتی حیکمە داکۆکی لە داواکاریە ڕەواکانی خەڵکی هەڵەبجە دەکات.
دواتر نوێنەری سەماحەتی عەممار حەکیم سەردانی مۆنۆمێنتی شەهیدانی کرد و تاجە گوڵینەی وەفایان لەسەر مۆنۆمێنتی عومەری خاوەر دانا.

لە کۆتای سەردانەکەشیاندا کەسایەتی دیاری کۆمەڵایەتی هەڵەبجە و سەرۆک عەشرەتی نەوڕۆڵی تەحسین میرزا حەسەن یان بەسەر کردەوە.
PUKMEDIA