سەرۆک بافڵ بۆ سەرۆک وەزیران : پشتیوانتان دەبم

بافڵ جەلال تاڵەبانی سەرۆکی یەکێتیی نیشتمانیی کوردستان و محەمەد شیاع سودانی سەرۆک وەزیرانی عیراق

سەرۆکی یەکێتیی نشتمانیی کوردستان بەبۆنەی متمانەدان بەکابینەی نوێ حکومەتی عیراق بروسکەیەک ئاڕاستەی سەرۆک وەزیران و وەزیرەکان دەکات و پشتیوانی خۆی بۆ حکومەتی نوێی عیراق دووپاتدەکاتەوە.

دەقی بروسکەکە..

بەڕێز محەمەد شیاع سودانی، سەرۆک وەزیرانی نوێی عیراق و سەرجەم وەزیرە بەڕێزەکان.
بەبۆنەی دەستپێکردنی ئەرکی نوێ و متمانەپێبەخشینتان لەلایەن ئەنجوومەنی نوێنەرانەوە پیرۆزباییەکی گەرمتان ئاڕاستە دەکەین.

ئەمە سەرەتایەکی نوێ و هیوابەخشە بۆ جێبەجێکردنی رێکار و هەنگاوە دەستوورییەکان لەپێناو پێشکەشکردنی خزمەتگوزاری و بونیادنانی داهاتوویەکی سەقامگیر لە وڵاتدا.

یەکێتیی نیشتمانیی کوردستان باوەڕی تەواوی بە هەماهەنگی و کاری هاوبەش هەیە لەپێناو سەرخستنی کارنامەی حکومەتی نوێ، پرۆسەی چاکسازی و بەهێزترکردنی پایەکانی دەوڵەتداری. بەندەش هاوکار و پشتیوانتان دەبم لەپێناو بەدیهێنانی ئامانجە باڵاکان و پتەوکردنی پەیوەندییە نیشتمانییەکان، کە ئەمەش خۆی لە پاراستنی مافە دەستوورییەکانی گەلی کورد و هەموو گەلانی عیراق، پێشکەشکردنی خزمەتگوزاری زیاتر و تەبایی و پێکەوەژیاندا دەبینێتەوە.
هیوادارین حکومەتی نوێ وەڵامدەرەوەی خواست و ویستی هەموولایەک بێت و بەرەو بونیادنانی داهاتوویەکی گەشتر هەنگاوبنێت.

جارێکیتر پیرۆزبایی لە ئێوە و سەرجەم وەزیرە بەڕێزەکان دەکەم و هیوای سەرکەوتنتان بۆ دەخوازم.


دڵسۆزتان
بافڵ جەلال تاڵەبانی
سەرۆکی یەکێتیی نیشتمانیی کوردستان
٢٧ی تشرینی یەکەمی ٢٠٢٢