دیلۆیت:لەسێ ملیار دۆلاری داهاتی نەوت حكومەتی هەرێم زیاتر لەملیارێكی بۆ ماوەتەوە

كۆمپانیای دیلۆیت بۆ وردبینی داهاتی نەوتی هەرێم بڵاویكردەوە كە حكومەتی هەرێم لەفرۆشتنی نەوت لەماوەی سێ مانگدا كە كۆی داهاتەكەی زیاتر لە سێ ملیار دۆلار بووە، زیاتر لەملیارێك دۆلاری بۆ ماوەتەوە.

كۆمپانیای دیلۆیت راپۆرتێكی تری لەبارەی هەناردەكردنی نەوتی هەرێم و داهاتەكەی بڵاوكردەوەو بەپێی راپۆرتەكەش، لەماوەی سێ مانگی یەكەمی سەرەتای ئەمساڵدا هەرێم زیاتر لە 36 ملیۆن بەرمیل نەوتی لەڕێی بۆرییەوە هەناردەی دەرەوە كردوەو داهاتەكەی زیاتر لە سێ ملیار دۆلار بووە، بەڵام زیاتر لە ملیارێكی بۆ حكومەتی هەرێم ماوەتەوە.
راپۆرتەكەی دیلۆیت دەڵێت: لە 1ی كانونی دووەمی 2022 تا 31ی ئاداری 2022، حكومەتی هەرێم لەڕێی بۆرییەوە بڕی 36 ملیۆن و 453 هەزارو 590 بەرمیل نەوتی هەناردەی دەرەوە كردوەو بەتێكڕاش هەر بەرمیلێك بە 86 دۆلارو 73 سەنت فرۆشراوەو كۆی داهاتەكەشی سێ ملیارو 28 ملیۆن و 903 هەزارو 497 دۆلار بوو‌و بەداهاتی فرۆشتنی نەوتی ناوخۆوە گەیشتوەتە سێ ملیارو 63 ملیۆن و 356 هەزارو 891 دۆلار.
دیلۆیت ئاشكراشیكردوە: حكومەتی هەرێم لەكۆی فرۆشتنی نەوت بەبۆری و فرۆشتنی ناوخۆوە لەماوەی سێ مانگی یەكەمی ئەمساڵدا كە داهاتەكەی زیاتر لە سێ ملیار دۆلار بووە، تەنها ملیارێك و 343 ملیۆن و 841 هەزارو 232 دۆلاری بۆ ماوەتەوە.

PUKmedia