لە تاریکستانی سیاسەتدا، هێشتا ئومێد هەیە

پەرێز عومەر

سەردەمانێکە زۆربەی ململانێ سیاسی و حزبیەکان لە باشوری کوردستان، ململانێیە لەسەر دەسەڵات لەپێناو چەند کەسێک و چەند دەستکەوتێکی تاکەکەسی و گروپی، دوور لە بەرپرسیارێتی مرۆڤانەی نیشتمانی و نەتەوەیی...

جا لەنێو ئەم تاریکستانە چەندە جوانە کاتێک کەسانێک دەبینی هێشتا لەنێو دونیای سیاسەتدا ماون کە سیاسەت بەوپەڕی ئەخلاق بەرزی و مرۆڤ دۆستیەوە بە بەرپرسیارێتی دەبینن و هەنگاوەکانیان لە خزمەت دۆزی ڕەواو بوارە جیاجیاکانن بەشێوەیەک لەپاڵ هەموو خەمەکان، گرنگی لایەنە پەراوێز خراوەکانیش دەبینن ئەمە بەڕاستی ئومێد بەخشە.

لەم ڕۆژانەدا شانازیەکی گەورەترم بەوە کرد کە لەسەر ڕێبازی مام و کوڕەکانی خەبات دەکەم و بەو پەڕی دڵسۆزی و تواناوە هەوڵ دەدەم شتەکان وەک خۆی ببینم.

ئەوەی لە چەند ڕۆژی ڕابردوو لە هەنگاوەکانی کاک قوباد تاڵەبانی بینیمان هێندە گرنگ بوون کە من و دەیانیتر هەست بەو شانازیە بکەین.

گرنگی دان بە وەرزشی گروپێکی جوان، بەڵام پەراوێز خراو و بەستنی قەیتانی پێڵاوەکانی گەنجێکی جوانی وڵات تەنها کارێکی چەند چرکەیی نیە، بەڵکو دەرکەوتنی جوانیەکانی ناخی قوڵی کەسایەتیەکی سیاسی و کاریگەرە، پەیامێکیشە بۆ ئەوانەی درەنگ تێدەگەن.

هەروەها وتارەکەی لە ڤیستڤاڵی فیلمی کان و وردەکاری و قوڵی وتەکانی، دونیا بینی کاک قوباد دەردەخات، کە چەندین ساڵە دەیان کەسی خەمخۆر خەمی لێدەخۆن، بەڵام دەستەوەستان و بێ پشتیوانن، هەروەها مژدەی ئەوەمان پێدەدات کە خۆشبەختانە سیاسیەک هەیە لە گرنگی و کاریگەری سینەمای جیهانی تێدەگات بۆ دۆزی ڕەوای گەلەکەمان و گەیاندنی چیرۆکەکانمان لەپێناو ڕاکێشانی سۆزی جیهانی و لەهەمانکاتدا نیشاندانی جوگرافیا و کلتوری جوانی گەلەکەشمان بەدونیا لەپێناو بازرگانیەکی دروستی پڕ لەهەلی کار لە ئاستێکی بەرزی جیهانیدا.

PUKMEDIA