سەرۆك و هەولێر و پێكهاتەكان

لەتیف نێروەیی

(6)

كەرنەڤاڵی پایتەخت، بە تەنها نمایشكردنی هێزی یەكێتی و سەنگی جەماوەرەكەی نییە، هەروەك تەنها بەشێك نییە لە دیزاینی پێشوەختەی هەڵبژاردن و سەركەوتنی لیستەكەی یەكێتی، بەڵكو ئاماژەسازییەكی دیكەی ئامادەیی سەرۆك بافڵ تاڵەبانی-یە لە پایتەختێك، كە یەكێتی هەمیشە بەشاری سەوز و قووڵایی ستراتیژی خۆی زانیوە، دروستە كە هەمیشە هەولێر بەشێكە لە ستراتیژیەت و بایەخی سیاسیی سەرۆك و سەركردایەتیی یەكێتی، بەڵام ئامادەبوون و مانەوەی بەردەوامی مانایەكی دیكەش لەخۆی دەگرێت و لە كەرنەڤاڵەكەشدا بە هەموو هەولێرییەكانی راگەیاند كە لەمەودوا هەولێر دەكات بە ماڵی دووەم و لەنزیكەوە لەگەڵ هەولێرییەكان دەمێنێتەوە.

پەیامەكەی ئەمجارەی سەرۆكی یەكێتی لە پایتەخت جیاواز لە زۆربەی پەیامەكانی پێشتری، قووڵتر پەنجە لەسەر برینەكان دادەنێت و كێشەكان راڤە دەكات، نەخشەڕێگای یەكێتیانەش بۆ چارەسەركردنی ئاریشە هەمەجۆر و هەمیشەییەكان دەخاتەڕوو، ئەوەی لە پەیامەكەی ئەمجارەدا بەرجەستە بوو، تەنها رەهەندێكی كێشەكان نەبوو، بەڵكو چارەسەری بنەڕەتیانەش بەشێك بوو لە رێكار و ستراتیژی یەكێتی بۆ قۆناغی داهاتوو لە پایتەختی هەرێم.

-پەیامێكی تایبەتیش بۆ پێكهاتەی رەسەنی توركمان، دیدێكی مرۆییانە و نیشتمانیانەی یەكێتیی نیشتمانیی كوردستانە بۆ ئەوەی نەتەوەكان نوێنەرایەتی راستەقینەیان هەبێت، بۆ ئەوەی مامەڵەی هاووڵاتیبوونیان لەگەڵ بكرێ و بەشێك بن لە كەڤاڵی گشتی نیشتمانی، دەبێت رێز لە ناسنامە و شوناس و زمان و مافەكانیان بگیرێت، بۆ ئەمەش بەڵێنی هەمیشەیی یەكێتیانەی دووپاتكردەوە كە بە سیاسەت و دیپلۆماسیەت و تەنانەت بە هێزیش لە پشت بەدیهێنان و پاراستنی خواست و داخوازییە رەواكانی ئەو پێكهاتەیە دەبێت و یەكێتی وەك هەمیشە چەتری پاراستنی توركمان دەبێت.

-سەبارەت بە ماف و داخوازیی كریستیانەكانیش لۆژیكی سەرۆك بافڵ تاڵەبانی روون و راشكاو و بەهێزبوو، كە ئیدی چیتر قبووڵی ناكەین گۆڕینی دیمۆگرافیا و زەوتكردنی زەوی كریستیانەكان درێژە بكێشێ و بۆ لەمەودوا و دەستخستنەوەی ئەو مافە، كێشەی داگیر و دابەشكردنی زەوییەكان دەكرێت بە كەیسێكی یاسایی و لە دادگا عیراقی و نێودەوڵەتییەكان یەكێتی دەبێتە پارێزەر، ئەم بەڵێنەی سەرۆك و دڵنیاییدان بەو پێكهاتە رەسەنە لەكاتێكدایە كە لە چوارچێوەی سیاسەتێكی نابەرپرسانەی نوخبەیەكی سیاسی، ساڵانێكە گوند و زەویوزاری كریستیانەكان داگیردەكرێت و خەڵكی رەسەن لە زێدەكەی خۆیان دووردەخرێنەوە و لەچەندین راپۆرتی نیودەوڵەتیدا ئاماژە بەداگیركردنی زەویوزاری كریستیانەكان دراوە، بەپێی یاسای نێودەوڵەتی ئەو جۆرە داگیركارییە بەهەموو شێوەیەك و لەسەرتاسەری جیهان قەدەغەكراوە و هەر دەسەڵات و فەرمانڕەوایەك ئەنجامیبدات، رووبەڕووی سزای پێشێلكردنی بنەماكانی مافی مرۆڤ دەبێتەوە.

ئەو دوو پەیامەی سەرۆك بۆ پێكهاتەكان، بەتەنها دڵنیاییدان نەبوو بەوان، بەڵكو دووپاتكردنەوەی سیاسەت و باوەڕی نەگۆڕی سەرۆك مام جەلال-یشە كە لە كتێبـی (یەكێتیی نیشتمانیی كوردستان بۆچی؟) بە روون و راشكاوی ناسنامەی كوردستانیی دووپاتكردۆتەوە و بەبێ یەكسانی و دادپەروەری و فەراهەمكردنی مافی هاووڵاتیبوون، چەپكەگوڵەكەی هەڤاڵ مام جەلال پارێزراونابێت.

PUKMEDIA