ترس و دوژمنی وەهمی

لەتیف نێروەیی

ئەوەی لە شاری هەولێر بەرامبەر کوڕە شەهیدێکی یەکێتی ئەنجامیانداوە نەک هەر ئازایەتی نەبوو، بەڵکو رەفتارێکی ئەوپەڕی ترسنۆکانە و قێزەون بوو.

پێدەچێ ئەوانەی ئەو رەفتارەیان ئەنجامداوە هەر ئەوەندە لە بانگەشە و پرۆسەی دیموکراسی تێبگەن و بەو شێوەیە فێرکراون کە سنوری ئازادی بۆ بانگەشە و پرۆسەی دیموکراتی تائەو شوێنە بڕدەکات کە تەنها وێنە و رەنگی خۆیان ببینن، تەنها دەنگی خۆیان ببیستن، تەنها ئاڵا و درۆشمەکانی خۆیان هەڵواسن، جگەلەوە دەنگ و رەنگەکانی دیکە بە بڤە و گەف و مەترسی تێدەگەن و هەندێجار نەک ترسێکی وەهمی بەڵکو دوژمنێکی گەورەی وەهمی لە خەیاڵ و هزردانی خۆیاندا دروست دەکەن.

ئەگەر هۆکارەکە ترسی وەهمی و دوژمنی وەهمی نەبێت بۆچی زیاتر لە 40 کەس لە رۆژی رووناک و لەبەرچاوی خەڵک و لە ناو بازاڕ پەلاماری گەنجێک دەدەن کە بەشێوەیەکی مەدەنیانە بانگەشە بۆ ئەو لایەنە دەکات کە خۆی قەناعەتی پێی هەیە.

PUKMEDIA