چیرۆکی کورتی دیموکراسیی لە مەچکۆ

ستران عەبدوڵڵا

کەیفیان لەگەڵ دیموکراسی و هەڵبژاردن ناسازێ، بە ئاماژەی دەستیش  بێت هەر نیشانی دەدەن کە زۆریان پێ خۆش نییە دیاردەکانی کەمپین و ناساندن و بڵاوکردنەوەی بەرنامە و دروشمی هەڵبژاردن ببینن. حەز دەکەن کوێر بن و کەڕ بن بەس دروشمێکی جیاواز نەبینن و بانگەوازێکی تازە  نەبیستن. رۆژەکانی پروپاگەندەی هەڵبژاردن و جموجۆڵی لایەنەکان بۆ خۆنواندن و باسکردنی روانگە و سیاسەت و بەرنامەکانیان وەک رۆژی تاڵ و تار و تەقویمی درێژی بێ تەحەمول دەبینن. خواخوایانە  زوو بڕوا و قەت نەیەتەوە. دوژمنی سەرسەختیان  ئەم یاسا و رێسایانەن کە کۆمسیۆن و مۆمسێۆن و دادگا و دەستور بۆ پرۆسەی هەڵبژاردن دایان ناوە. چیبکەن ؟ ناچارن وەک دەرد و بەڵای ناگەهان مامەڵەی لەگەڵ بکەن. سات و سەعات و رۆژگاری کورتی دیموکراسی لای ئەوان ساڵ و سەدە و هەزارەیە  و گەرەکیانە زوو تێپەڕێت و زوو بچنەوە سەر رێگە قەدیم  و خۆشەویستەکەی خۆیان کە هەر خۆیان بڕیار بدەن و هەر رەنگی خۆیان و هەر دەنگی خۆیان زاڵ بکەنەوە.

زۆر مەبەستیانە بە پەلە و بێ دواکەوتن دەزگا و دوکانی دیموکراسیی بپێچنەوە و هیچ سیما و سیفەتێکی  نەبیننەوە.

مەشق دەکەن لەگەڵ ئەم شتە عەنتیکانەی لیست و رەنگ و کاندید و بانگەشە و هەوڵ دەدەن زوو تەواو بێت بەڵام هەر زوو هەڵدەچن و هەر زوو تەنگەتاو دەبن و لەنیوەی رێ پەتی تەحەمولیان دەپسێ و خۆیان ئاشکرادەکەن کە چ ماڵێکن .

دەست دەکەنەوە بە ئۆپەراسێۆنی شەق و زلە و پەلاماردان، دەست دەکەنەوە بە دیموکراسی جمێن و زمانی زبر  و قابیلی قبوڵ نییە، دەست دەکەنەوە بە بەکارهێنانی لایەنگرە سەرسەختەکانی خۆیان کە گوایە بەرێکەوت لەوێ بوون و نەیانزانیووە ، گوایە ئەم دەروێشانە زۆر پەرۆشی رەنگی زەردن و حەساسیەتیان هەیە بە رەنگی سەوز و سوور و رەنگی ئاڵواڵای دیموکراسی. 

لای ئەوان رۆژەکانی کەمپین وەک تەقویم و رۆزنامەی  دۆزەخ وایە و زۆر بە خاوی و دڕەنگ پەڕەکانی هەڵدەداتەوە.

ئەمە چیرۆکی کورتی پارتییە لەگەڵ دیموکراسی و هەڵبژاردن و ململانێی سیاسیی، دەتوانیت رۆمانی چەند جڵدیشی لەسەر بنوسیت . دیموکراسییەکەی جیکڵدانی تەنگە  و کەم تەحەمول و نەفەس کورت . دیمەنی وایە کە دوێنێ لەگەڵ گەنجانی سەوز لە هەولێر بە بەرچاوی مەچکۆوە کردیان . 
پایتەختیان وا شێواندووە قەڵای سەربەرز و دێرین  خۆی شایەتی سەدان پێشێلکاری وایە و بۆ رۆژی خۆی هەڵیگرتووە تا هەڵیرێژێ.

ئەمە چیرۆکی دیموکراسییە لای زەرد کە دەشڵێن  لەوەتەی هەین هەموو هەڵبژاردنێکمان بردۆتەوە.  
ئاخر ئاوا بردوتانەتەوە کە هەموو شتێک دەلەوتێنن و دۆ و دۆشاو تێکەڵ دەکەن. لە یەکەم تەجرەبەی هەڵبژاردنیش، لەساڵی 1992، هەر واتان گوت: سێ بەشی  کورد پارتییە، پەرلەمانمان بۆ چییە؟

هەر واتان هێناوە کە سوعبەتی هەڵبژاردنتان بۆ قووت نادرێ  و کەیفتان  بە دیموکراسی نایەت. هەر واتان کردووە دامەی دەکەن تا براوەن، کە گەمەکە هاوسەنگ دەبێ  توڕە دەبن و چای  و قاوەی میوانداریش  بەسەر یەکدا دەترچێنن: قابیلی قبوڵ نییە.

 PUKMEDIA