Financial Times: Zêdeyî 20 hezar kes ji Kampa Holê reviyane

AP

Kampa El-Hol

Rojnameya Financial Times di raportek xwe ragihand ku piştî ku herêm ket bin kontrola Hikûmeta Demkî ya Sûriyeyê, zêdetirî 20 hezar girtî ji kampa El-Hol ya ji bo alîgirên DAIŞê û malbatên wan li bakur-rojhilatê Sûriyê reviyane.

Financial Times wiha got:Di meha borî de, ji ber ku hêzên Kurdî yên ku deverên derdorê kontrol dikirin ji aliyê hêzên ewlehiyê yên hikûmeta Sûriyê ve hatin derxistin, hema hema hemî 24 hezar girtiyên kampê bê şop winda bûn.

Rojnameyê destnîşan kir ku bi hezaran girtiyên ku di kampê de girtî bûn karîn ji qulên di têlan de birevin û berê xwe dane seranserê welêt, û hin ji wan karîn bi ne yasayî derbasî Îraq û Turkiyê bibin.

Raporê zêde kir ku "tenê nêzîkî 2,000 welatiyên Îraqî û Sûrî di kampê de mane,Financial Times piştrast kir ku ne diyar e kê alîkariya girtiyan kiriye ku birevin.

Di vê çarçoveyê de, berdevka UNHCR li Sûriyê, Celine Schmitt, piştrast kir ku UNHCR di hefteyên dawî de kêmbûnek girîng di nifûsa kampa El-Hol de dîtiye.

Hikûmeta Demkî ya Sûriyê niha kampê vala dike û malbatên çekdarên DAIŞê vediguhezîne kampeke din ya nêzîkî gundê Exterîn li parêzgeha Helebê ku heta niha nêzîkî 400 kes ji wir derketine.

Kamp nêzîkî 24 hezar kesan li xwe digire, di nav wan de nêzîkî 15 hezar Sûrî û zêdetirî 6 hezar û 300 jin û zarokên biyanî ji 42 neteweyan hebûn, ji ber ku piraniya welatên wan hîna jî red dikin ku wan vegerînin welatên xwe.

Êrîşên komên Hikûmeta Demkî ya Sûriyê li ser taxên Şêx Meqsûd û Eşrefiyê yên Helebê û deverên din yên li bakur-rojhilatê Sûriyê bûn sedema revîna bi sedan endamên DAIŞê ji zîndanên di bin parastina Hêzên Sûriye Demokratîk de, bi taybetî li Reqa, Şedadê û Holê.

PUKMEDIA