Bi riya Qubad Talebanî weberhênerên Siûdî tên Silêmaniyê

Nivîsingeha Ragihandina Qubad Talebanî

Qubad Talebanî û weberhênerên Siûdiyê

Qubad Talebanî Cîgirê Serokwezîr pêşwazî li şandeyeke bazirganên Siûdî bi serokatiya Mihemed Silêman El-Esîrî, Konsulê Giştî yê Siûdî li Herêma Kurdistanê kir û li ser çawaniya pêşxistina peywendiyên aborî yên di navbera her du welatan de gotûbêj kirin.

Di civîna ku roja Şemiyê 07/02/2026 li Silêmaniyê pêk hat de, Qubad Talebanî behsa pêvajoya pêşketina Herêma Kurdistanê û siyaseta hikûmetê ya ji bo piştgirîkirin û hêsankirina weberhênerên biyanî kir û ragihand ku li Herêma Kurdistanê, bi taybetî li parêzgeha Silêmaniyê, derfetên mezin ji bo weberhênerên Siûdî hene û amadebûna xwe û rêveberiya herêmî ya Silêmaniyê ji bo her cûre piştgirî û hêsankariyan nîşan da.

Di beşeke din a civînê de, behsa girîngiya rola sektora taybet di aboriya Herêma Kurdistanê û parêzgeha Silêmaniyê de hate kirin,ku I salên dawiyê de kerta taybet bi awayekî berbiçav xurttir bûye û di pêşveçûna aborî de roleke bingehîn dilîze.

Her di vê çarçoveyê de, her du alî li hev kirin ku ji bo xurtkirina peywendî û hevkariya di navbera her du kertên taybet yên Kurdistan û Erebistana Siûdiyê de kar bikin û bi vî awayî di pêşerojê de asta peywendiyên aborî û bazirganî yên di navbera her du aliyan de xurt bikin.

PUKMEDIA