NY:Kar ji bo çareseriya pirsgirêkên Kobanê û Kampa Holê tê kirin

Malpera UN

Wêneyek ya koçberan

Nivîsgeha Hemahengiyê ya Kar û Barên Mirovî ya Neteweyên Yekgirtî (OCHA) der barê dorpêça li ser Kobanê de daxuyaniyek belav kir û têde diyar kir ku tîma NY’yê bi rayedarên li Helebê re di nava dan û standinan de ye bo dabînkirina riyên piştgiriya lezgîn ji bow î bajarî.

Çekarên hikumeta demkî ya Sûriyê, piştî ku gundewarên başûrê Kobanê dorpêç kirin, nêzî hefteyekê ye dorpêçeke giran daniye ser bajarê Kobanê û tevahî rêyên diçin bajar birîne.

Nivîsgehê bi bîr xist ku tevkarên wê yên li Kobanê dixebitin, fikarên xwe yên zêde ji ber rewşa mirovî anîne ser ziman û got: li Kobanê enerjî, av û kareba qut in, ev yek xizmetên bingehîn asteng dike û li gorî raportan xurek, derman û pêdiviyên din kêm in.

Nivîsgeha Hemahengiyê ya Kar û Barên Mirovî ya Neteweyên Yekgirtî (OCHA) tekez kir ku tîma Neteweyên Yekbûyî ji bo dîtina rêbazên piştgiriya lezgîn bo Kobanê bi desthilata li Helebê re di nava dan û standinan de ye.


Ji aliyekî din ve Neteweyên Yekbûyî ragihand ku roja Înê, bi hevkariya rayedarên hikûmeta Sûriyê, gihîştiye kampa El-Hol ya li Sûriyê û karîbû bi hin akinciyên kampê re têkilî dayne û alîkariya mirovî bigihîne wan.

Ev yek di demekê de ye ku li gor nûçeyek Rewangeha Sûrî bo Mafên Mirov ji ber sermayê çar zarokan li bajarê Kobanî ya Rojavayê Kurdistanê canê xwe ji dest dane.

PUKMEDIA