Civata Asayîşê rewşa Rojavayê Kurdistanê gotûbêj kir

AJANS

Civîna Civata Asayîşa Neteweyên Yekbûyî

Civata Asayîşa Neteweyên Yekbûyî ji bo gotûbêjkirina rewşa mirovî ya metirsîdar û êrîşên artêşa Sûriyê yên bo ser deverên Rojavayê Kurdistanê civiya.

Di civîna îro ya Neteweyên Yekbûyî derbarê rewşa Sûriyê de,Rêveberê Bersivdayîna Qeyranan raportek li ser metirsiyên li ser welatiyên sivîlên li Sûriyê pêşkêşî Civata Asayîşê ya Neteweyên Yekbûyî kir.

Nûnerê Amerîkî got: Hikûmeta Sûriyê amade ye berpirsiyariya zîndan û kampên DAIŞê bigire ser xwe, û tekezî li ser mafên Kurd û parastina ziman û çanda wan di destûrê de kir.

Fransa: Daxwaza parastina jin, zarok û welatiyên Kurd dike

Ji aliyekî din ve, Fransa daxwaza parastina jin, zarok û welatiyên Kurd kir, lê balyozê dewleta Turkiyeyê pîrozbahî li Artêşa Sûriyê kir, di heman demê de Rûsya piştgiriya xwe ji bo yek artêş û yek welat nîşan da, bi mercê ku dadperwerî ji bo Kurdan hebe.

Îsraîl: Em koçkirin û kuştina Kurdên Sûriyê şermezar dikin

Balyozê Îsraîlê Danny Danon bi tundî rexne li koçberiya bi darê zorê û kuştinên li deverên Kurdan girt û got:Divê hikûmet bi kiryarên xwe werin pîvandin, ne tenê bi gotinên xwe, ji ber ku Kurdan di têkbirina DAIŞê de roleke sereke lîstin.

Ev civîn piştî derbazbûna zêdetirî du hefteyan bêdengiya navneteweyî li hemberî  êrîşên li ser Rojava tê, ku piraniya welatan ji bilî Îsraîlê xwe ji şermezarkirina rasterast ya êrîşên Artêşa Sûriyê dûr girtin.

PUKMEDIA