Qubad Talebanî: Li ser bingeha prensîba hevpariya rastîn hikûmetek xizmetguzar ava bikin

PUKMEDIA

Qubad Talebanî û Andrew Beasley, Konsulê Giştî yê Brîtanyayê li Herêma Kurdistanê

Qubad Talebanî Cîgirê Serokwezîrê Herêma Kurdistanê îro Pêncşemê 11ê Kanûna Pêşîn a 2025an pêşwaziya Andrew Beasley, Konsulê Giştî yê Brîtanyayê li Herêma Kurdistanê kir.

Di hevdîtinê de, herdu aliyan li ser zirara lehiyên ku li Navçeya Çemçemal û Rêveberiya Germiyanê çêbûne axivîn. Konsulê Giştî yê Brîtanyayê sersaxî ji malbatên qurbaniyan û kesên ku ji lehiyê bandor bûne re xwest.

Ji aliyê xwe ve, Cîgirê Serokwezîr piştrast kir ku tedbîrên pêwîst ji bo hêsankirina vegera kesên ku bandor bûne bo malên xwe hatine girtin, û dê gav werin avêtin da ku di pêşerojê de bûyerên bi vî rengî dubare nebin.

Di beşek din a civînê de, mijara avakirina hikûmeta pêşerojê ya Herêma Kurdistanê hate gotûbêj kirin, Qubad Talebanî tekez kir ku "Yekîtiya Niştimanî ya Kurdistanê amade ye ku li ser bingeha prensîba hevpariya rastîn, danûstandinên li ser avakirina hikûmetekê ji nû ve dest pê bike û xizmet bê cudahî ji hemû deverên Kurdistanê re werin pêşkêş kirin.

Di derbarê avakirina hikûmeta nû ya Îraqê de, Qubad Talebanî behsa serdana xwe ya dawî ya Bexdayê kir û got, "Di dema serdanê de me nerîn û bernameya YNKê ji hêzên siyasî yên Îraqê re şîrove kir û me girîngiya avakirina hikûmetek bihêz ku bikaribe pirsgirêkên Îraqê, di nav de pirsgirêkên di navbera Herêma Kurdistanê û Bexdayê de bi têgihîştin û li gorî bendên destûrê çareser bike, tekez kir.

PUKMEDIA