Qubad Talebanî derbarê bûyera Çemçemalê de du fermanên lezgîn da

PUKMEDIA

Qubad Talebanî

Qubad Talebanî, Cîgirê Serokwezîrên Herêma Kurdistanê, îro di serdana xwe ya meydanî ya navçeya Çemçemalê de piştrast kir ku serdana wî ji bo hevxemiyê bi niştecihan re û ji bo nirxandina rasterast a asta zirara baran û lehiyên duh çêbûye ye. Wî destnîşan kir ku rêjeya windahiyan wêranker bû, û xemgîniya malbatên ku qurbanî lê hebûn hevxemiya hemûyan e.

Talebanî got ku ew xemgîniya niştecihan parve dike û sersaxiyên xwe yên ji dil pêşkêşî malbatên xemgîn kir. Wî piştgiriya xwe ya tevahî ji bo hemî kesên ku ji vê bûyerê bandor bûne tekez kir û soz da ku wê ji bo sivikkirina êşa wan û vegerandina aramiyê li herêmê bixebite.

Di çarçoveya bersiva tavilê de, Cîgirê Serokwezîr du ferman lezgîn ragihand:

1. Avakirina Yekîneyeke bersiva awarte û nûjankirinê, ku bi van berpirsiyariyên jêrîn hatiye erkdarkirin:

• Bi lez û bez pêdiviyên bingehîn ji bo kesên zerarmend peyda bike, di nav de mal, xwarin, ava paqij û lênihêrîna bijîşkî.

• Hevrêzkirina erkên saziyên hikûmetê, hêzên ewlehiyê, sektora taybet û rêxistinên nehikûmî.
• Nûjenkirina xizmetên girîng û binesaziya zirar dîtî.
 • Tomarkirina malbatên koçber û dabînkirina piştgiriya pêwîst ji wan re.
• Xurtkirina hevrêziyê di navbera hemî tîmên rizgarkirinê yên xwecihî û herêmî de.
• Pêşxistina planeke zelal ji bo ji nû ve avakirin û bersivdayîna krîzên bi vî rengî di hefteyên pêş de.


2. Avakirina komîteyek lêkolînê ji bo xwendineke zanistî li ser paşxaneya bûyerê û sedemên wê, eşkerekirina kêmasiyên wê û girtina tedbîrên pêwîst ji bo pêşîgirtina li dubarebûna bûyerên bi vî rengî di pêşerojê de.

Qubad Talabanî tekez kir, "Niha bala me li ser alîkariya welatiyan e. Em ê paşê li dû rastiyan biçin û hesabê her kesekî xemsar bidin. Em ê xelkê Çemçemal, Şorş, Pîryadî û Kelarê bi tenê nehêlin. Em ê bi wan re bimînin heta ku jiyan vegere rewşa normal.

Aşkire kir ku hêza Çemçemalê di îradeya xelkê wê û hevgirtin û piştgiriya niştecihên bajar û herêmên din ên Kurdistanê de ye, û piştrast kir, "Bi hev re, mil bi mil, em ê tiştê ku zirar dîtiye ji nû ve ava bikin."

PUKMEDIA