Rêjeya hejariyê li Îraqê kêm dibe

AFP

Dîmenek ji bazarek li Besra

Wezareta Plandanana Îraqê ragihand ku rêjeya hejariyê li gorî salên berê daketiye ji sedî 6 û amadekariyên destpêkirina stratejiyek kêmkirina hejariyê ji bo 2026-2030 an jî dest pê kiriye.

Berdevkê Wezareta Plandananê Ebdul Zehra El-Hindawî ragihand ku rêjeya hejariyê li Îraqê îsal daketiye,ev ji ber siyaset û tedbîrên hikûmetê yên ji bo rû bi rûbûna hejariyê ye.

Her weha dibêje: Li gorî rapirsiya dawî ya ku ji aliyê Wezareta Plandananê ve hatiye encamdan, rêjeya hejariyê daketiye ji sedî 17, ev yek jî di demekê de ye ku di sala 2022an de ev rêje ji sedî 23 bû.

Berdevkê Wezareta Plandananê sedemek din ya kêmbûna hejariyê bi misogerkirina ewlehiya xwarinê û berfirehkirina xizmetguzariya civakî, ku zêdetir çîn di nav xwe de digire, ve girêda.

Amaje bi wê yekê kir ku, sindoqa Piştgiriya Herêmên hejar di salên dawî de li hejmarek parêzgehan projeyên xizmetguzariyê pêk aniye, ji bilî rola Sindoqa Geşepêdana Civakî ya Wezareta Plandananê, ku bi dehan proje li zêdetirî 500 gund li seranserî Îraqê bicih aniye, di nav de avakirina xwendingeh û navendên tenduristiyê, berfirehkirina torên av û karebayê, û çakkirina Riyan.

Derbarê planên wan yên ji bo salên pêş de, Ebdul Zehra El-Hendawî, berdevkê Wezareta Plandananê ya Îraqê, aşkere kir ku,Wezareta Plandananê amadekariyên xwe ji bo destpêkirina Stratejiya Kêmkirina hejarî ya salên 2026-2030 berdewam dike, ku dê pêngavên ku di du stratejiyên berê de serketî bûne bavêje.

PUKMEDIA