فوئاد حسێن: سەرۆكی هەرێم لەڕێی ئەم بژاردانەوە هەڵدەبژێردێت

.

سەرۆكی دیوانی سەرۆكایەتی هەرێم دوای كۆتایهاتنی كۆبوونەوەی پێنج قۆڵی لەكۆنگرەیەكی رۆژنامەوانیدا ئەنجامی كۆبوونەكەی ئەمڕۆی لەبارەی میكانیزمی هەڵبژاردنی سەرۆكی هەرێم ئاشكراكرد.

لەبارەی میكانیزمی سەرۆكی هەرێم رایگەیاند: میكانیزمی یەكەم ئەوەیە هەڵبژاردنی سەرۆكی هەرێم لەڕێگەی ریفراندۆمەوە بێت، هەڵبژاردنی سەرۆكی هەرێم لەخولی داهاتووی پەرلەمانی كوردستانەوە بێت، هەروەها هەڵبژاردنی سەرۆكی هەرێم لەڕێی پەرلەمانی ئێستاوە بێت و ئەویش بەدوو شێوە، یەكێكیان ئەوەی سەرۆكی هەرێم بەدەنگی دوو لەسەر سێ دەنگی پەرلەمانتاران بێت، ئەگەر ئەوەش سەركەوتوو نەبوو بەزۆرینەی دەنگی پەرلەمانتاران بێت 50+1.  

سەرۆكی دیوانی سەرۆكایەتی هەرێم راشیگەیاند: كۆبوونەوەی داهاتووی پێنج قۆڵی رۆژی 6ی ئەیلول بەڕێوەدەچێت و لایەنەكان ئەو بژاردانە دەبەنەوە لای سەرکردایەتیان و لەوێ تاوتوێی دەكەن و دواتر لەكۆبوونەوەكەدا قسەی لەسەر دەكرێت، و هیوادارین لەكۆبوونەوەی داهاتوودا بگەینە رێكەوتنی كۆتایی و ئەو رێكەوتنەش دەبێتە پاكێجێك.

وتیشی: ئەگەر لایەنەكان لەسەر ئەوە نەگەیشتنە رێكەوتن لەهەرێمی كوردستان هەڵبژاردنی پێشوەخت بكرێت.

ئەوەشی خستەڕوو كە هەر لەو كۆبوونەوەیەدا بڕیاری ئەوەش دراوە كە لایەنەكان هەڵمەتی راگەیاندن بەرامبەر یەكتر رابگرن.

PUKmedia تایبەت