عیراقچی: پێناچێت تا دووشه‌ممه‌ بگه‌ینه‌ رێككه‌وتن

سه‌ید عه‌باس عیراقچی

له‌كاتێكدا ئه‌مرِۆ دوا واده‌یه‌ بۆ گه‌یشتن به‌ رێككه‌وتن له‌سه‌ر به‌رنامه‌ ئه‌تۆمییه‌كه‌ی ئێران، یاریده‌ده‌ری وه‌زیری ده‌ره‌وه‌ی ئێران ئاشكرایكرد كه‌ پێناچێت تا رۆژی دووشه‌ممه‌ له‌نێوان تاران و كۆمه‌ڵه‌ی وڵاتانی (1+5) رێككه‌وتن له‌سه‌ر به‌رنامه‌ ئه‌تۆمییه‌كه‌ی ئێران بێته‌ ئاراوه‌.

سه‌ید عه‌باس عیراقچی یاریده‌ده‌ری وه‌زیری ده‌ره‌وه‌ی ئێران له‌ كۆنفرانسێكی رۆژنامه‌وانیدا له‌ شوێنی كۆبوونه‌وه‌ ئه‌تۆمییه‌كه‌ له‌ شاری لۆزان-ی سویسرا رایگه‌یاند: هیچ رێككه‌وتنێكی سیاسی تائێستا له‌ ئارادا نییه‌و پێناچێت گفتوگۆ ئه‌تۆمییه‌كان تا رۆژی دووشه‌ممه‌ بگات به‌ ئه‌نجام.

له‌كاتێكدا ئه‌مرِۆ 31-3-2015، دوایین مۆڵه‌تی دیاریكراوه‌ بۆ رێككه‌وتن له‌ نێوان ئێران و كۆمه‌ڵه‌ی وڵاتانی (1+5) له‌سه‌ر به‌رنامه‌ ئه‌تۆمییه‌كه‌ی تاران، یاریده‌ده‌ری وه‌زیری ده‌ره‌وه‌ی ئێران رایگه‌یاندووه‌ مه‌حاڵه‌ له‌م یه‌ك دوو رۆژه‌دا هه‌ردوولا بگه‌نه‌ رێككه‌وتن.

جێی باسه‌ له‌ئێستادا وه‌فدی ئێران و كۆمه‌ڵه‌ی وڵاتانی (1+5) له‌ شاری لۆزان-ی سویسرا سه‌رقاڵی كۆبوونه‌وه‌ن بۆ گه‌یشتن به‌ رێككه‌وتنی ئه‌تۆمی، ئه‌مه‌ش له‌ كاتێكدایه‌ ئێران پێشتر رایگه‌یاندووه‌ كه‌ تاران نه‌رمی زۆری نواندووه‌و ده‌بێت لایه‌نی به‌رامبه‌ریش نه‌رمی بنوێنێت و سزاكان له‌سه‌ر ئێران لاببرێت.

PUKmedia     وه‌رگێرِان/ جه‌واد حه‌یده‌ری
سه‌رچاوه‌/ رادیۆ فه‌ردا