یه‌په‌گه‌ ئاماده‌كاری بۆ وه‌رگرتنه‌وه‌ی دیله‌كان ده‌كات

"ئاماده‌ی گۆڕینه‌وه‌ی دیله‌كانین"

دوای رفاندنی ژماره‌یه‌كی زۆر هاووڵاتی ئاشوری و مه‌سیحی له‌گونده‌كانی باشوری ته‌ل ته‌مر، ئیداره‌ی كانتۆنی جه‌زیره‌ ئاماده‌یی خۆی بۆ گۆڕینه‌وه‌ی دیله‌كانی خۆی له‌گه‌ڵ داعش ده‌ده‌بڕێت، به‌رامبه‌ر به‌و تیرۆرستانه‌ی داعش كه‌له‌به‌رخودانی كۆبانێ و ته‌ل حه‌میس و ته‌ل ته‌مردا له‌لایه‌ن هێزه‌كانی یه‌په‌گه‌ و یه‌په‌ژه‌ به‌دیلگیراون.

له‌و باره‌یه‌وه‌ دكتۆر ناسر حاج مه‌نسور به‌رپرسی په‌یوه‌ندییه‌كانی ده‌ره‌وه‌ی كانتۆنی جه‌زیره‌ به‌ PUKmedia ی راگه‌یاند: وه‌كو ئیداره‌ی كانتۆنی جه‌زیره‌ هه‌رچیه‌ك له‌تواناماندا بێت بۆ رزگاركردنی ئه‌و هاووڵاتیه‌ ئاشوری و مه‌سیحیانه‌ی ژێرده‌ستی داعش ده‌یخه‌ینه‌گه‌ڕو ئاماده‌یی گۆڕینه‌وه‌ی ئه‌و دیلانه‌ی داعشین كه‌له‌لامانن به‌رامبه‌ر به‌و هاووڵاتیانه‌.

وتیشی: له‌به‌رخودانی كۆبانێ و ته‌ل حه‌میس و ته‌ل ته‌مر ژماره‌یه‌كی زۆر تیرۆرستی داعش له‌لایه‌ن هێزه‌كانی یه‌په‌گه‌ و یه‌په‌ژه‌وه‌ ده‌ستگیركراون و ئاماده‌ین له‌به‌رامبه‌ر ئازادكردنی هاووڵاتیه‌ ئاشوری و مه‌سیحیه‌كان له‌گه‌ڵ گروپی تیرۆرستی داعشدا بیانگۆڕێنه‌وه‌.

جێگای ئاماژه‌یه‌،  تیرۆرستانی داعش له‌ناوه‌ڕاستی هه‌فته‌ی رابردوودا په‌لاماری گونده‌كانی باشوری ناوچه‌ی ته‌ل ته‌مریانداو ژماره‌یه‌كی زۆر هاووڵاتی ئاشوری و مه‌سحیان رفاند ئه‌مه‌ جگه‌ له‌وه‌ی ژماره‌یه‌كی تریشیان لێكوشتبوون.

PUKmedia سامان یاروه‌یس