هه‌رێم و به‌غدا له‌سه‌ر ناردنی مووچه‌ رێكده‌كه‌ون

عه‌بادی له‌باره‌ی موچه‌وه‌ ره‌زامه‌ند بووه‌و وتویه‌تی به‌زووترین كات و بڕیار له‌سه‌ر ناردنی ده‌دات

سه‌رچاوه‌یه‌ك له‌ ئه‌نجومه‌نی نوێنه‌رانی عیراق رایده‌گه‌یه‌نێت: له‌ كۆبوونه‌وه‌ی عه‌بادی له‌گه‌ڵ وه‌فدی هه‌رێم، له‌سه‌ر چاره‌سه‌ركردنی كێشه‌ی مووچه‌ی فه‌رمانبه‌رانی هه‌رێم رێككه‌وتوون.

سه‌رچاوه‌یه‌ك له‌ ئه‌نجومه‌نی نوێنه‌رانی عیراق به‌ PUKmedia ی راگه‌یاند: له‌ كۆبوونه‌وه‌كه‌ی حه‌یده‌ر عه‌بادی سه‌رۆك وه‌زیرانی عیراق له‌گه‌ڵ وه‌فدی هه‌رێمی كوردستان كه‌ رۆژ نوری شاوه‌یس سه‌رپه‌رشتی كردبوو، هه‌ردوولا به‌ته‌واوه‌تی له‌سه‌ر چاره‌سه‌ركردنی كێشه‌ی مووچه‌ی فه‌رمانبه‌رانی هه‌رێم رێككه‌وتوون و رۆژی سێشه‌ممه‌ مووچه‌ ره‌وانه‌ی حكومه‌تی هه‌رێم ده‌كرێت.

سه‌رچاوه‌كه‌ ئاماژه‌ی بۆئه‌وه‌شكرد: له‌و كۆبوونه‌وه‌یه‌دا هه‌ردوولا له‌سه‌ر ئه‌وه‌ رێككه‌وتوون كه‌ حكومه‌تی هه‌رێم ده‌بێت له‌ باره‌ی دۆسیه‌ی نه‌وته‌وه‌ شه‌فاف بێت و له‌ رێگه‌ی كۆمپانیای سۆمۆوه‌ ره‌وانه‌ی ده‌ره‌وه‌ی بكات و به‌غداش له‌ داهاته‌كه‌ی ئاگاداربێت، له‌وڕووه‌شه‌وه‌ وه‌فدی هه‌رێمی كوردستان ره‌زامه‌ندی خۆی ده‌ربڕیوه‌و عه‌بادیش له‌ باره‌ی مووچه‌وه‌ ره‌زامه‌ند بووه‌و وتویه‌تی به‌زووترین كات و له‌ كۆبونه‌وه‌ی ئه‌نجومه‌نی وه‌زیراندا بڕیار له‌سه‌ر ناردنی ده‌دات.

له‌ باره‌ی كێشه‌كانی تریشه‌وه‌ ئه‌و سه‌رچاوه‌یه‌ وتی: له‌ ماوه‌ی 10 رۆژی ئایینده‌دا وه‌فدی هه‌رێمی كوردستان دووباره‌ سه‌ردانی به‌غدا ده‌كاته‌وه‌و گفتوگۆكان له‌ باره‌ی خاڵه‌كانی تره‌وه‌ ده‌ستپێده‌كات، هه‌رچه‌نده‌ عه‌بادی له‌ سه‌ردانه‌كه‌ی بۆ سلێمانی به‌ یه‌كێتی و گۆڕانی راگه‌یاندبوو كه‌ به‌پێی ده‌ستوور ته‌واوی كێشه‌كان چاره‌سه‌رده‌كات.

PUKmedia  سامان یاروه‌یس