كیری: پشتگیری وڵاته‌كه‌ی بۆ عیراق دژی داعش دوپاتده‌كاته‌وه‌‌

كۆبوونه‌وه‌ی جۆن كیری و فوئاد مه‌عسوم

له‌چواچێوه‌ی چاوپێكه‌وتنه‌كانی له‌گه‌ڵ سه‌رۆك و به‌رپرسانی ده‌ره‌وه‌ی وڵاتان له‌ په‌راوێزی كۆنگره‌ی پاریس بۆ چه‌سپاندنی ئاشتی و له‌ناوبردنی داعش له‌ عیراق، د. فوئاد مه‌عسوم سه‌رۆك كۆماری عیراق پێشوازی له‌ جۆن كیری وه‌زیری ده‌ره‌وه‌ی ئه‌مریكا و وه‌فدی هاوڕێی كرد.

له‌و چاوپێكه‌وتنه‌دا كه‌ د.ئیبراهیم جه‌عفه‌ری وه‌زیری ده‌ره‌وه‌ی عیراق ئاماده‌یی بوو ئه‌مڕۆ 15-9-2014، گفتوگۆ له‌باره‌ی گۆنگره‌ی پاریس و هه‌وڵه‌ نێوده‌وڵه‌تیه‌كان كرا بۆ پشتگیریكردنی عیراق له‌ رووبه‌ڕوبونه‌وه‌ی تیرۆرستانی داعش.

هه‌ر له‌وچاوپێكه‌وتنه‌دا جۆن كیری وه‌زیری ده‌ره‌وه‌ی ئه‌مریكا ته‌ئكیدیكرده‌وه‌ له‌سه‌ر وه‌ستانی ویلایه‌ته‌یه‌كگرتووه‌كانی ئه‌مریكا به‌رامبه‌ر عیراق بۆ له‌ناوبردنی تیرۆرستانی داعش و ئاماده‌یی وڵاته‌كه‌ی بۆ زیاتر كاركردن له‌سه‌ر ئاستی ده‌وڵه‌تانی جیهان دووپاتكرده‌وه‌ له‌ پێناو پته‌وكردنی هاوپه‌یمانی دژی تیرۆر.

له‌لای خۆشیه‌وه‌ د. فوئاد مه‌عسوم خۆشحاڵی و دڵنیای خۆی بۆ هه‌ڵوێستی ویلایه‌ته‌یه‌كگرتووه‌كانی ئه‌مریكا ده‌ربڕی و داواشی له‌ وه‌زیری ده‌ره‌وه‌ی ئه‌مریكا كرد، سوپاسی بگه‌یه‌نێته‌ سه‌رۆك ئۆباما.

PUKmedia