تاقانه‌كانی ئه‌نفال: ئاماده‌ین قوربانی زیاتر بده‌ین‌و به‌رگری له‌ كوردستان بكه‌ین ‌

ئاماده‌یی خۆیان بۆ چوونه‌ به‌ره‌كانی جه‌نگ دژ به‌ نه‌یارانی ‏كوردو ده‌ستی ره‌شی تیرۆر ده‌رده‌برِن ‌

هێزه‌كانی پێشمه‌رگه‌ به‌بێ سڵه‌مینه‌وه‌ له‌تیرۆریستانی داعش، له‌به‌ره‌كانی جه‌نگدا به‌رگری له‌خاكی كوردستان ده‌كه‌ن، ته‌واوی چین‌و ‏توێژه‌كان به‌هه‌موو شێوه‌یه‌ك ئاماده‌ی خۆیان پیشانداوه‌ بۆ به‌رگریكردن له‌خاكی كوردستان، له‌نێویشیاندا تاقانه‌كانی ئه‌نفال ‏له‌گه‌رمیان دیسانه‌وه‌ ئاماده‌ن گیانی خۆیان فیدای كوردستان بكه‌ن‌ و ئاماده‌یی خۆیان بۆ چوونه‌ به‌ره‌كانی جه‌نگ دژ به‌ نه‌یارانی ‏كوردو ده‌ستی ره‌شی تیرۆر ده‌رده‌برِن ‌و داواكاریشن هه‌موولایه‌ك بۆ به‌رگریكردن له‌و ده‌ستكه‌وتانه‌ی به‌ده‌ستهاتوون، به‌رگری له‌خاك‌و ‏نیشتمان بكه‌ن.‏

كوردستان پێویستی پێمانه‌ ‏

به‌ختیار مه‌حمود كه‌ له‌ناو خێزانه‌كه‌یدا به‌ته‌نیا ماوه‌ته‌وه‌و هه‌موویان ئه‌نفالكراون پێیوایه‌ ئێستا كاتیه‌تی‌و كوردستان پێویستی ‏به‌هه‌موولایه‌كه‌ بۆئه‌وه‌ی به‌رگری لێبكه‌ن ئه‌و بۆ PUKmedia ده‌ڵێت: ئه‌م هه‌رێمه‌ به‌خوێنی سه‌دان هه‌زار شه‌هید پێكهێنراوه‌و ‏قۆناغێكی گه‌وره‌ی گۆرِانكاری‌و پێكه‌وه‌یی‌و گه‌شه‌كردنی برِیوه‌، بۆیه‌ ئێستا پێویسته‌ هه‌موومان به‌رگری لێبكه‌ین‌و تا بیه‌وێت ‏قوربانی زیاتری له‌پێناودا بده‌ین.‏

به‌ختیاری تاقانه‌ی ئه‌نفال كه‌ خه‌ڵكی قه‌زای كفریه‌ جه‌خت له‌وه‌ ده‌كاته‌وه‌: وه‌كو تاقانه‌كانی ئه‌نفال، ئاماده‌ین جارێكی تر ‏قوربانی بده‌ین‌و بچینه‌وه‌ به‌ره‌كانی جه‌نگ‌و خوێنی زیاتر بۆ كوردستان بده‌ین.‏

ده‌چنه‌ به‌ره‌كانی جه‌نگ ‏
به‌هه‌مانشێوه‌ به‌كر مه‌عروف تاقانه‌یه‌كی تری ئه‌نفاله‌و خه‌ڵكی ناحیه‌ی رزگارییه‌ بۆ PUKmedia ده‌دوێت‌و له‌باره‌ی ئه‌و شه‌رِه‌ی ‏روبه‌ڕوی خاكی كوردستان بۆته‌وه‌ ده‌ڵێت: كورد هه‌رگیز سه‌ری بۆ دوژمن دانه‌نواندووه‌، جا ئیتر له‌هه‌ر قۆناغێكدا بێت، جگه‌له‌وه‌ی ‏ده‌ستی بۆ خاكی هیچ كه‌سێكی تریش نه‌بردووه‌و زوڵمی له‌ هیچ میلله‌تێكی تر نه‌كردووه‌، بۆیه‌ ئێستا نه‌یاره‌كانمان كه‌ مێژوویه‌كه‌و ‏هه‌رجاره‌و به‌ناوێك‌و هه‌رجاره‌و به‌سیناریۆیه‌ك ده‌یانه‌وێت له‌ناومان به‌رن، پێیان ده‌ڵێین خه‌یاڵیان خاوه‌ هه‌موو كورد بۆیان ده‌بێته‌ ‏پێشمه‌رگه‌و رووبه‌رِوویان ده‌بێته‌وه‌و دیسانه‌وه‌ به‌ری چاویان ده‌گرێت‌و له‌ناویان ده‌بات.‏

ئه‌و تاقانه‌یه‌ی ئه‌نفال وه‌ك خۆی باسی ده‌كرد هه‌ر له‌سه‌روبه‌ندی دروستبوونی شه‌رِی دژه‌ تیرۆر له‌ناوچه‌كانی كوردستان به‌تایبه‌ت ‏ئه‌و ناوچانه‌ی له‌وانه‌وه‌ نزیكن ئه‌وانیش خانه‌قین، جه‌له‌ولا، سه‌عدیه‌، قه‌ره‌ته‌په‌و خورماتوو، به‌رده‌وام چوونه‌ته‌ به‌ره‌كانی جه‌نگ‌و جگه‌ ‏له‌به‌سه‌ر كردنه‌وه‌ی برا پێشمه‌رگه‌كان هاوشانیان دژی داعش جه‌نگاون‌و ده‌جه‌نگێن.‏

وتیشی: بۆیه‌ پیرۆزی‌و سه‌روه‌رییه‌ ئێمه‌ی تاقانه‌ی ئه‌نفال جارێكی تر خوێنی خۆمان له‌پێناو نیشتمانه‌ پیرۆزه‌كه‌ماندا به‌خت بكه‌ین ‏وه‌كو چۆن له‌رِابردوودا ته‌واوی كه‌سوكاره‌كانمان له‌پێناو ئه‌م خاكه‌دا شه‌هیدبوون.‏

‏150 تاقانه‌ی ئه‌نفال
سه‌باح نه‌جمه‌دین نوێنه‌رێكی تری تاقانه‌كانی ئه‌نفاله‌و له‌باره‌ی ئه‌م دۆخه‌ی ئێستا هه‌یه‌ سه‌رنجی خۆی ده‌ربرِی‌و وتی: یه‌كێك له‌و ‏خاڵه‌ گرنگانه‌ی به‌لای ئێمه‌ی تاقانه‌ی ئه‌نفاله‌وه‌ پێویسته‌ ئه‌م یه‌كهه‌ڵوێستی‌و پێكه‌وه‌ییه‌ بۆ رووبه‌رِووبوونه‌وه‌ی دوژمنانی كوردو ‏كوردستان درێژه‌ پێبده‌ین بۆئه‌وه‌ی بتوانین ته‌واوی ئه‌و قوربانیانه‌ی داومانه‌ بۆ ئه‌م رۆژانه‌، پارێزگاری لێبكه‌ین.‏

زیاتر له‌ 150 تاقانه‌ی ئه‌نفال له‌سنووری گه‌رمیاندا هه‌یه‌و به‌رده‌وام هه‌ماهه‌نگییان هه‌یه‌ له‌گه‌ڵ هێزه‌كانی پێشمه‌رگه‌و به‌باشی درك ‏به‌ مه‌ترسییه‌كانی سه‌ر كوردستان ده‌كه‌ن، بۆیه‌ داواكارن خه‌ڵك درك به‌و مه‌ترسیانه‌ بكات كه‌ هاتوونه‌ته‌ پێشه‌وه‌و قوربانیدان ‏به‌لایه‌وه‌ پیرۆزترین شت بێت، هه‌روه‌ك فه‌رمانده‌ی تاقانه‌ی ئه‌نفالیان هه‌یه‌ كه‌ له‌ناوچه‌كانی خورماتوو و قه‌ره‌ته‌په‌ خزمه‌ت به‌خاكی ‏كوردستان ده‌كه‌ن‌و گیانی خۆیان كردووه‌ته‌ قه‌ڵغان بۆ گه‌له‌كه‌یان بۆئه‌وه‌ی جارێكی ترو له‌قۆناغێكی تری خه‌باتدا، خزمه‌ت ‏به‌كوردستانه‌كه‌یان بكه‌ن.‏

سه‌باح وتیشی: خۆمان له‌كه‌س به‌گه‌وره‌ترو جیاوازتر نازانین، بۆیه‌ باكمان نییه‌ جارێكی تر قوربانی بده‌ین‌و له‌پێناو ئه‌م خاكه‌دا ‏شه‌هید ببین، ئاماده‌م هه‌ر حه‌وت منداڵه‌كه‌م له‌پێناو خاكی كوردستاندا به‌خت بكه‌م.‏

قوربانیدان سه‌ربه‌رزیه‌ ‏
تاقانه‌یه‌كی تری ئه‌نفال كه‌ هاوكات به‌رپرسێكی حكومییه‌و له‌به‌ره‌ی جه‌نگیشدایه‌ دژ به‌چه‌كداره‌كانی داعش بۆ PUKmedia ‏دواو وتی: ئێستا گه‌وره‌ترین شانازی به‌و قوربانیانه‌وه‌ ده‌كه‌ین كه‌ له‌پێناو ئه‌م خاكه‌دا داومانه‌ له‌به‌رئه‌وه‌ی گه‌وره‌ترین پایه‌ی ‏نیشتمانپه‌روه‌ری شه‌هیددانه‌ بۆ خاكی دایك.‏

وه‌هاب ئه‌حمه‌د به‌رِێوه‌به‌ری ناحیه‌ی قه‌ره‌ته‌په‌ ئه‌وه‌ ده‌خاته‌رِوو كه‌ زیاتر له‌ 50 كه‌س له‌تاقانه‌كانی ئه‌نفال له‌به‌ره‌كانی جه‌نگدا ‏تاكو پله‌ی باڵای سه‌ربازیش خزمه‌ت به‌خاكی كوردستان ده‌كه‌ن‌و هیچ گوێ به‌وه‌ ناده‌ن له‌كام شوێنی كوردستاندا شه‌هید ده‌بن.

 ‏وتیشی: ده‌مێكه‌ قوربانی ده‌ده‌ین‌و ئێمه‌ی گه‌لی كورد وادروست كراوین له‌هه‌ر ئان‌و ساتێكی مێژوودا شه‌هیدمان هه‌بێت‌و ‏داگیركه‌رمان له‌خاكه‌كه‌مان ده‌ركردبێت، بۆیه‌ پێویسته‌ ئه‌وه‌ش به‌گه‌وره‌ترین شانازی بزانین گه‌ر له‌ هه‌ر ماڵێكی كوردستاندا شه‌هیدێك ‏هه‌بێت كه‌ ئێمه‌ ته‌واوی كه‌سوكارمان شه‌هیدبووه‌.‏

خوێنی شه‌هیده‌كانمان به‌فیرِۆ نه‌چێت

سه‌باح نه‌جمه‌دینی تاقانه‌ی ئه‌نفال زیاتر هه‌ڵوێستی خۆی روونده‌كاته‌وه‌و ده‌ڵێت: پێویسته‌ لایه‌نه‌ سیاسییه‌كان‌و خه‌ڵكی ‏كوردستان به‌گشتی‌و رۆشنبیران‌و رۆژنامه‌نووسان‌و ته‌واوی ئه‌وانه‌ی به‌رپرسیاریه‌تی نیشتمانیان له‌سه‌رشانه‌، دوای تێپه‌رِبوونی ئه‌م ‏قۆناغه‌، هه‌وڵبده‌ین خوێنی شه‌هیده‌كانی شه‌رِی دژه‌ تیرۆر به‌فیرِۆنه‌چێت‌و بتوانین بیكه‌ینه‌ هه‌وێنی برایه‌تی‌و به‌هێزكردنی سیستمی ‏حوكمرِانی، هه‌روه‌ها گرنگیدان به‌هێزه‌كانی پێشمه‌رگه‌و كه‌سوكاری شه‌هیدان‌و ته‌واوی دامه‌زراوه‌ حكومی‌و كۆمه‌ڵایه‌تی‌و ‏هونه‌رییه‌كان‌و كایه‌كانی تر چرِبكرێنه‌وه‌.‏

لای خۆشیه‌وه‌ وه‌هاب ئه‌حمه‌دی تاقانه‌ی ئه‌نفال كه‌ به‌رِێوه‌به‌ری ناحیه‌ی قه‌ره‌ته‌په‌یه‌ هاوهه‌ڵوێسته‌ له‌گه‌ڵ سه‌باح نه‌جمه‌دین‌و ‏ئاماژه‌ بۆ ئه‌وه‌ ده‌كات: باشترین هه‌لومه‌رج ره‌خساوه‌ بۆئه‌وه‌ی هه‌موومان پێكه‌وه‌ بتوانین هه‌رێمه‌كه‌مان زیاتر په‌ره‌پێبده‌ین‌و بیكه‌ینه‌ ‏هه‌وێنی برایه‌تی‌و پێكه‌وه‌ژیان‌و كاری زیاتر بكه‌ین بۆئه‌وه‌ی بره‌و به‌ژیانی پێشمه‌رگه‌ بدرێت‌و ژیانی خۆیان‌و خێزان‌و منداڵه‌كانیان ‏خۆش بكرێت‌و ئیمتیازاتی زیاتر بۆ كه‌سوكاری شه‌هیدان‌و ئه‌نفالكراوانیش دابینبكرێت.

PUKmedia سامان یاروه‌یس