خۆپیشاندان دژی خوێندنی ئەلكترۆنی دەستیپێكرد

.

لە سلێمانی دژی خوێندنی ئەلكترۆنی خۆپیشاندانی خوێندكاران دەستیپێكرد و داوایان كرد كە خوێندنگەكان بكرێنەوە یان خوێندن بە یەكجاری رابگیرێت. 

ئەمڕۆ 21-4-2021، لە بەردەم بەڕێوەبەرایەتی گشتی پەروەردەی سلێمانی دژی خوێندنی ئەلكترۆنی خۆپیشاندانی خوێندكاران دەستیپێكرد و رایانگەیاند: سیستمی ئەلكترۆنی سیستمێكی باش نییە و داوا لە وەزارەتی پەروەردە دەكەین خوێندنگەكان بكاتەوە یان بە یەكجاری خوێندن رابگرێت.

راشیانگەیاند: لە وانەكان تێناگەن و سیستمی ئەلكترۆنی بارگرانییەكی زۆری خستووەتە سەریان، چونكە پێویستیان بە ئامێری زیرەك و هێڵی ئینتەرنێتی باش هەیە. 

ئەمەش لەكاتێكدایە، رۆژی 17-4-2021، حكومەتی هەرێم و وەزارەتی تەندروستی بەهۆی هەڵكشانی حاڵەتەكانی ڤایرۆسی كۆرۆنا و زیادبوونی رێژەكانی تووشبوون بە ڤایرۆسەكە، بڕیاری راگرتنی خوێندنی ناو پۆلیان دەركرد و دوای دەرچونی فەرمانی وەزارەتی پەروەردەش وەك شوێنگرەوە، خوێندنی ئەلكترۆنی و ئۆنلاین پەسەندكرا.

ئەمە لە كاتێكدایە پێشتریش یەكێتی مامۆستایانی كوردستان  لەبارەی پرۆسەی پەروەردەوە راگەیەنراوێكی بڵاوكردەوە و هۆشداری دایە وەزارەتی پەروەردە كە ئەو جۆرە خوێندنە سەركەوتوو نابێت، دەبێت خوێندن بەردەوامبێت، چونكە پیادەكردنی خوێندنی ئەلیكترۆنی روبەڕووی كێشە دەبێتەوە.

PUKmedia تایبەت