وه‌فدی هه‌رێم ده‌چێته‌وه‌ به‌غدا

.

وته‌بێژی جێگری سه‌رۆك وه‌زیرانی هه‌رێمی كوردستان رایگه‌یاند: وه‌فدی هه‌رێمی كوردستان بۆ گفتوگۆی چه‌ند بژاره‌یه‌ك له‌باره‌ی نه‌وت‌ و بودجه‌ی كوردستانه‌وه‌ له‌م هه‌فته‌یه‌دا سه‌ردانی به‌غدا ده‌كه‌نه‌وه‌.

 سه‌میر هه‌ورامی، وته‌بێژی جێگری سه‌رۆك وه‌زیرانی هه‌رێمی كوردستان به‌ PUKmedia ی راگه‌یاند: له‌م هه‌فته‌یه‌دا وه‌فدی دانوستانكاری هه‌رێمی كوردستان بۆ گفتوگۆكانی له‌گه‌ڵ حكومه‌تی عیراق له‌باره‌ی پرسی نه‌وت‌ و بودجه‌ی هه‌رێمی كوردستان، سه‌ردانی به‌غدا ده‌كاته‌وه‌.

 وته‌بێژی جێگری سه‌رۆك وه‌زیرانی هه‌رێم وتیشی: ئه‌ندامانی وه‌فده‌كه‌ هیچ گۆڕانكارییه‌كیان تێدا نه‌كراوه‌و هه‌مان ئه‌ندامی وه‌فده‌كه‌ی پێشوو ده‌بن و پێده‌چێت رۆژی دووشه‌ممه‌ یان سێشه‌ممه‌ له‌گه‌ڵ حكومه‌تی عیراق ده‌ست به‌ گفتوگۆكان له‌باره‌ی نه‌وت‌ و بودجه‌ی هه‌رێمی كوردستان بكاته‌وه‌.
 
سه‌میر هه‌ورامی ئاماژه‌ی به‌وه‌شدا، چه‌ند بژارده‌یه‌ك ئاماده‌كراون و له‌گه‌ڵ حكومه‌تی عیراق گفتوگۆیان له‌باره‌وه‌ ده‌كرێت، وتیشی: پێشنیازه‌كانیش هه‌موو ده‌گه‌ڕێنه‌وه‌ سه‌ر ئه‌وه‌ی هه‌رێمی كوردستان چه‌ند نه‌وت له‌ رێگه‌ی كۆمپانیای سۆمۆوه‌ هه‌نارده‌ ده‌كات ‌و به‌غداش چه‌ند پاره‌ بۆ هه‌رێمی كوردستان ده‌نێرێت. ئه‌وه‌ ده‌بێته‌ ته‌وه‌ری سه‌ره‌كی گفتوگۆكان.
 
هه‌فته‌ی رابردو وه‌فدێكی حكومه‌تی هه‌رێمی كوردستان به‌سه‌رۆكایه‌تی قوباد تاڵه‌بانی جێگری سه‌رۆكی ئه‌نجومه‌نی وه‌زیرانی هه‌رێم بۆ گفتوگۆی پرسی نه‌وت ‌و بودجه‌ی هه‌رێمی كوردستان و چاره‌سه‌ركردنی كێشه‌ هه‌ڵواسراوه‌كانی نێوان هه‌رێم و حكومه‌تی فیدراڵی سه‌ردانی به‌غدای كرد، به‌ڵام نه‌گه‌یشتنه‌ رێككه‌وتنی كۆتایی، به‌ڵام بڕیاردرا گفتوگۆكانی نێوان هه‌ردوولا له‌و باره‌یه‌وه‌ به‌رده‌وامبن.

PUKmedia تایبه‌ت