شاره‌زایه‌ك: هێرشه‌كه‌ی داعش به‌ تاكتیكێكی زۆر گه‌وره‌ ئه‌نجامدراوه‌

.

شاره‌زایه‌كی ئه‌منی رایگه‌یاندووه‌: له‌دوای شكستی داعش ئه‌مه‌ یه‌كه‌مجاره‌ ئه‌و رێكخراوه‌ تیرۆرستییه‌ به‌و پیلان و تاكتیكه‌ سه‌ربازییه‌ هێرش بكات.

دوای ئه‌وه‌ی شه‌وی رابردو رێكخراوی تیرۆرستی داعش له‌پارێزگای سه‌ڵاحه‌دین هێرشی كرده‌سه‌ر چه‌كدارانی حەشدی شەعبی و زیانێكی زۆری پێ گه‌یاندن، هیشام هاشمی شاره‌زای بواری ئه‌منی له‌ نوسینێكیدا له‌ئه‌كاونتی تایبه‌تی خۆی له‌ تۆڕی كۆمه‌ڵایه‌تی تویته‌ر رایگه‌یاندووه‌، له‌دوای شكستهێنانی سه‌ربازی داعش له‌ عیراق و ناوچه‌كه‌، ئه‌مه‌ یه‌كه‌م هێرشی پیلان بۆ داڕێژڕاوی ئه‌و رێكخراوه‌ تیرۆرستییه‌ كه‌ به‌ تاكتیكێكی سه‌ربازی زۆر شاره‌زا ئه‌نجامدرابێت، به‌و هۆیه‌شه‌وه‌ زیانی زۆری به‌ چه‌كدارانی حه‌شدی شه‌عبی له‌ سه‌ڵاحه‌دین گه‌یاندووه‌.

راشیگه‌یاندووه‌، داعش له‌ 4 ناوچه‌ی سامه‌ڕاوه‌ به‌یه‌كجار هێرشی كردووه‌ته‌ سه‌ر حه‌شدی شه‌عبی و سه‌ره‌ڕای گه‌یشتنی هاوكاری پۆلیسی فیدراڵی و هێزی دژه‌تیرۆرو سوپاو هێزی ئاسمانی، به‌ڵام هێرشه‌كانی داعش ماوه‌ی 3 سه‌عات به‌رده‌وامی هه‌بووه‌و زیانی زۆر گه‌وره‌ی به‌ حه‌شدی شه‌عبی گه‌یاندووه‌.

PUKmedia به‌دواداچوون