لیژنه‌هاوبه‌شه‌كانی قائیمقامیه‌ت كافتریایه‌ك داده‌خه‌ن

.

به‌هۆی پابه‌ند نه‌بون به‌رێنمایه‌كانی خۆپارێزی و پێشكه‌شكردنی نێرگه‌له‌ به‌ میوانه‌كانی، لیژنه‌ هاوبه‌شه‌كانی قائیمقامیه‌تی سلێمانی كافتریای پیرۆزی داده‌خات.

فریاد عوسمان، سه‌رۆكی لیژنه‌ی ریستۆرانت و شوێنه‌ گه‌شتیارییه‌كانی سه‌ر به‌لیژنه‌ هاوبه‌شه‌كانی قائیمقامیه‌تی سلێمانی رایگه‌یاند: به‌هۆی پابه‌ند نه‌بون به‌رێنماییه‌كانی خۆپارێزی له‌ ڤایرۆسی كۆرۆنا و كردنه‌وه‌ی شوێنه‌كه‌ و پێشكه‌شكردنی نێرگه‌له‌ به‌ میوانه‌كانی، لیژنه‌كه‌ كافتریای پیرۆزی له‌ گه‌ڕه‌كی زه‌رگه‌ته‌، له‌شاری سلێمانی داده‌خات.
 
وتی: به‌مه‌به‌ستی كه‌مكردنه‌وه‌ی مه‌ترسییه‌كانی بڵاوبونه‌وه‌ی ڤایرۆسی كۆرۆنا ژوری ئۆپراسیۆنه‌كانی ‌شاری سلێمانی، كافتریا و كۆفی شۆپی كێشانی نێرگه‌له‌ داخراون و هه‌ر شوێنێكیش بیكاته‌وه‌ له‌لایه‌ن لیژنه‌ هاوبه‌شه‌كانی قائیمقامیه‌تی سلێمانییه‌وه‌ شوێنه‌كه‌ و خاوه‌نه‌كه‌شی روبه‌ڕوی رێكاره‌ یاساییه‌كان ده‌كرێته‌وه‌‌.
 
وتیشی: سه‌رپێچییه‌كانی تری كافتریای پیرۆزی، نه‌بونی مۆڵه‌تی كاركردن و نه‌گونجانی شوێنه‌كه‌ بۆ كێشانی نێرگه‌له‌یه‌، بۆیه‌ به‌پێی رێنماییه‌كانی ژوری خۆپارێزی و به‌فه‌رمانی قائیمقامی سلێمانی شوێنه‌كه‌ داده‌خرێت و خاوه‌نه‌كه‌شی روبه‌ڕوی رێكاری یاسایی توند ده‌كرێته‌وه‌.
 
سه‌رۆكی لیژنه‌كه‌ هه‌مو ئه‌و كافتریا و كۆفی شۆپی نێرگه‌له‌ كێشانی ئاگادار كرده‌وه‌، تائه‌و كاته‌ی ژوری خۆپارێزی بڕیار له‌ كردنه‌وه‌ی كافتریاكانی نێرگه‌له‌ نه‌دات، هیچ كه‌س و شوێنێك نه‌یكاته‌وه‌، به‌پێچه‌وانه‌وه‌ خۆیان روبه‌ڕوی رێكاری یاسایی توند ده‌بنه‌وه‌.

 لیژنه‌ی ریستۆرانت، یه‌كێكه‌ له‌ لیژنه‌ هاوبه‌شه‌كانی قائیمقامیه‌تی سلێمانی، به‌رده‌وام سه‌ردانی كافتریا و شوێنه‌ گه‌شتوگوزارییه‌كان ده‌كات، له‌كاتی هه‌بونی سه‌رپێچی، شوێنه‌كه‌ و خاوه‌نه‌كه‌شی روبه‌ڕوی رێكاری یاسایی توند ده‌كاته‌وه‌.

PUKmedia راگه‌یاندنی قائیمقامیه‌تی سلێمانی