وه‌زاره‌تی ته‌ندروستی: پزیشكان و كارمه‌ندانی ته‌ندروستی جێگای ڕێز و سوپاسكردنن

.

وه‌زاره‌تی ته‌ندروستی راگه‌یه‌نراوێكی بڵاوكرده‌وه‌و رایگه‌یاندووه‌، پزیشكان و كارمه‌ندانی ته‌ندروستی له‌سه‌نگه‌ری پێشه‌وه‌ی ڕوبه‌ڕوبونه‌وه‌ی ڤایرۆسی كۆڕۆنان كه‌ هه‌ڕه‌شه‌ له‌هه‌مو مرۆڤایه‌تی ده‌كات، بۆیه‌ هه‌میشه‌ جێگای ڕێز و سوپاسكردنن و پێویسته‌ به‌وپه‌ڕی ڕێزه‌وه‌ مامه‌ڵه‌یان له‌گه‌ڵ بكرێت له‌كاتی جوڵه‌ و هاتوچۆیان بۆ خزمه‌تی نه‌خۆش و ئه‌ركه‌كانیان بۆ چالاكیه‌كانی به‌ره‌نگاربونه‌وه‌ی ڤایرۆسی كۆڕۆنا، ئه‌مه‌ش ده‌قی راگه‌یه‌نراوه‌كه‌:

ڕاگه‌یه‌ندراوی ژماره‌ 38

بۆ پزیشكان و كارمه‌ندانی ته‌ندروستی خۆشه‌ویست . . .

خزمه‌ت و شه‌ونخونی و ماندووبونی ئێوه‌ هه‌میشه‌ جێگای ڕێز و پێزانین و سوپاسی بێپایانی حكومه‌تی هه‌رێم و ته‌واوی خه‌ڵكی كوردستانه‌. ئه‌مڕۆ ئێوه‌ له‌سه‌نگه‌ری پێشه‌وه‌ی ڕووبه‌ڕوبونه‌وه‌ی ڤایرۆسی كۆڕۆنان كه‌ هه‌ڕه‌شه‌ له‌هه‌موو مڕۆڤایه‌تی ده‌كات له‌جیهاندا، هه‌رێمی كوردستان له‌ئێستادا به‌قورسی ڕووبه‌ڕوی ئه‌و مه‌ترسیه‌ بۆته‌وه‌ و له‌و پێناوه‌دا ڕێوشوێنه‌كانی قه‌ده‌غه‌ی هاتووچۆ توندتركراوه‌ به‌مه‌به‌ستی پاراستنی ژیانی هاوڵاتیانی خۆشه‌ویست.

هه‌روه‌ك ده‌ركه‌وتووه‌ به‌هێزترین ڕێككار بۆ به‌ره‌نگاربونه‌وه‌ و كۆنتڕۆڵكردنی نه‌خۆشیه‌كه‌ ڕاگرتنی جوڵه‌ و قه‌ده‌غه‌كردنی هاتوچۆیه‌.

به‌م بۆنه‌یه‌وه‌ وێڕای ده‌ستخۆشیمان، هه‌موو پزیشكان و كارمه‌ندانی ته‌ندروستی دڵنیا ده‌كه‌ینه‌وه‌ كه‌ هه‌میشه‌ جێگای ڕێز و سوپاسكردنن و به‌وپه‌ڕی ڕێزه‌وه‌ مامه‌ڵه‌یان له‌گه‌ڵ ده‌كرێت له‌كاتی جوڵه‌ و هاتوچۆیان بۆ خزمه‌تی نه‌خۆش و ئه‌ركه‌كانیان بۆ چاڵاكیه‌كانی به‌ره‌نگاربونه‌وه‌ی ڤایرۆسی كۆڕۆنا، هاوكات سوپاسی برایان و هاوكارانمان ده‌كه‌ین له‌هێزه‌كانی ناوه‌خۆ و پۆلیس و لایه‌نه‌كانی تر كه‌ دڵسۆزانه‌ بۆ ڕێكخستن و جێبه‌جێكردنی ڕێككاره‌كانی قه‌ده‌غه‌ی هاتوچۆ له‌هه‌رێمی كوردستان ئه‌ركه‌كانیان به‌ هه‌ماهه‌نگی زیاتر ده‌بێت بۆ سه‌ركه‌وتن له‌سه‌ر قه‌یرانی نه‌خۆشی كۆڕۆنا.

وه‌زاره‌تی ته‌ندروستی
4 نیسان 2020

PUKmedia