یادی 74 ساڵەی لە سێدارەدانی چوار ئەفسەرەکەی کورد

.

74 ساڵ بەسەر لە سێدارەدان و شەهیدکردنی چوار ئەفسەرەکەی کورد(مسته‌فا خۆشناو، محه‌مه‌د قودسی، عیزه‌ت عه‌بدولعه‌زیز و خیروڵڵا عه‌بدولکه‌ریم) تێدەپەڕێت، کە دوای روخانی کۆماری کوردستان بە نیازپاکی خۆیان بڕواکردنیان بە بڕیارەکەی حکومەتی ئەو کاتی عیراق بڕیاری گەڕانەوە دەدەن.

هەر چوار ئەفسەرەکە پێشووتر و بەر لە دامەزراندنی کۆماری کوردستان لە عیراق بوون و لە ناو سوپای مەلەکیدا، پلە و پۆستەکەیان بە ئاواتێکی گەورەتر جێهێشت بوو.

حکومەتی عیراق، ئەگەرچی بڕیاری لێخۆشبوونی دەرکردبوو بۆ هەموو ئەوانەی دەگەڕێنەوە عیراق، بەڵام بڕیارەکە بۆ چوار ئەفسەرەکە پێچەوانە بوو، ئەوە بوو بە فەرمانی ساڵح جەبری سەرۆکی حکومەتی ئەوکاتی عیراق لە دادگای سەربازیدا لە 19ی حوزەیرانی ساڵی 1947دا حوکمی لە سێدارەنیان بەسەردا جێبەجێکرا.

دوای بڵاوبوونەوەی بڕیاری لە سێدارەدانیان، هاووڵاتیانی شاری سلێمانی خرۆشان و رژانە سەر شەقامەکان و ئێوارەی هەمان رۆژ خۆپیشاندان لەبەردەکی سەرا دەستیپێکرد و رووی لە فراوان بوون کرد، بەڵام وەک هەمیشە حکومەت بێباک بوو لە ئاست داواکاری هاووڵاتیان و خۆپیشاندەران، گوێی لێ نەگرتن و بڕیارەکە وەک خۆی جێبەجێکرا.

دوای جێبەجێکردنی بڕیارەکە و لە سێدارەدانی هەر چوار ئەفسەرەکە، تەرمەکانیان گەڕێنرایەوە کوردستان و هەر یەکەیان بەرەو زێدی خۆی بەڕێکرا.

PUKmedia کوردستانی نوێ