سەرۆکی دادگای باڵای تاوانەکان: 3300 تۆمەتبار فەرمانی دەستگیرکردنیان بۆ دەرچووە

واع

سەعد ئەللامی سەرۆکی دادگای باڵای تاوانەکانی عیراق

سەرۆکی دادگای باڵای تاوانەکانی عیراق، ئاشکرای دەکات کە نزیکەی 3300 فەرمانی دەستگیرکردن بۆ ئەو تۆمەتبارانە دەرچووە کە لە سەردەمی رژێمی پێشوودا تاوانی مرۆڤایەتیان ئەنجامداوە، ئاشکراشی دەکات: دادگای پێداچوونەوە سزای لەسێدارەدانی عەجاجی پەسەند کردووە و رێکارەکانی  لەسەرۆکایەتی کۆمارە.

 دادوەر سەعد ئەللامی سەرۆکی دادگای باڵای تاوانەکانی عیراق، لە چاوپێکەوتنێکیدا لەگەڵ ئاژانسی هەواڵەکانی عیراق، رایگەیاند: دادگاکەمان لە ساڵی 2005 دامەزراوە و درێژکراوەی ئەو دادگایەیە کە ئەنجومەنی حوکم لە ساڵی 2003 دایمەزراند، کە کارەکانی بۆ قۆناغێکی دیاریکراوی لێکۆڵینەوە بوو.

دەشڵێت: دادگاکەمان تا ئەو کاتەی سەر بە ئەنجومەنی وەزیران بوو،سزای لەسێدارەدانی بۆ 20 کەس لە سەرانی رژێمی پێشوو دەرکردووە، بەڵام لە دوای ساڵی 2012وە بووە بە دادگایەکی تایبەتمەند کە تایبەتە بە پرسی تیرۆر و دەستپاکی و تاوانی دژی مرۆڤایەتی و تاوانی جەنگ و کۆمەڵکوژی.

 لە بارەی سکاڵای نوێ و ئەو دۆسیانەی کاری لەسەر دەکەن، سەرۆکی دادگای باڵای تاوانەکانی عیراق، رایگەیاند: سکاڵای نوێ زۆر کەمە، بەڵام ئێمە کار لەسەر هەزارەها دۆسیە دەکەین و  نزیکەی سێ هەزار و 300 کەسیش فەرمانی دەستگیر کردنیان بۆ دەرچووە، کە لە سەردەمی رژێمی پێشوودا تاوانی دژ بە مرۆڤایەتیان ئەنجامداوە، بەشێکیان کێشە لە دەستگیرکردنەکاندا هەیە و بەشێکیشیان لە دەرەوەی وڵاتن.

رونیشی کردەوە: ئەو دۆسیایەنەی کە دادگا کاریان لەسەر دەکات، پەیوەستن بەو سکاڵانەی کە لەسەر تاوانەکانی نێوان 17ی تەموزی 1968 تا ئایاری 2003 تۆمار کراون.

 لە بارەی ئەو کەسانەشی سزا دراون، دادوەر سەعد ئەللامی سەرۆکی دادگای باڵای تاوانەکانی عیراق، ئاشکرای کرد: تاوەکو ئێستا 160 کەس سزا دراون، کە 26 کەسیان سزای لەسێدارەدانیان بەسەردا سەپێندراوە.

پەیوەست بە پرسی تاوانبار عەجاج و گۆڕە بە کۆمەڵەکانیش، رایگەیاند: قوربانیانی پرسی عەجاج ئەوانەی لە کیمیاباران و هێرشی سەربازی بۆ سەر ناوچەکانی هەرێمی کوردستان رزگاریان بوو، بەڵام دواتر دەستگیر کراون و بۆ بیابانەکانی باشووری عیراق گوازرانەوە، هەروەها ژن و منداڵ و پیاو لە یەکتری جیا کرانەوە و سیاسەتی برسیکردن لە دژیان بەکار هێنرا، بۆ ئەوەی زۆرترین کەسیان گیان لەدەستبدەن.

دەشڵێت: برسێتی و بەرزبوونەوەی پلەی گەرما لە مانگی تەمووزدا بووە هۆی ئەوەی ژمارەیەکی زۆریان گیان لەدەستبدەن، دواتریش زیندانیکراوان ناچار دەکران، تەرمەکان لە دەرەوەی گرتوخانەکان بەخاکبسپێرن، بەڵام بەهۆی رەقی زەوییەکە بەخاکسپاردنەکان قورس بوون و بە بەرد تەرمەکان دادەپۆشران، دواتریش سەگە بەرەلاکان تەرمەکانیان دەخواردن، رزگاربووان شایەتیان لەسەر ئەم رووداوە ترسناکانە داوە.

 لە بارەی سزای لە سێدارەدانییش بۆ عەجاج، رایگەیاند: دادگای پێداچوونەوە سزاکەی پەسەند کردووە و رێکارەکانی  لەسەرۆکایەتی کۆمارە.

 لە کۆتایشدا، سەعد ئەللامی سەرۆکی دادگای باڵای تاوانەکانی عیراق، ئاشکرای کرد: 227 کەس سکاڵایان لەسەر عەجاج تۆمار کردووە، هەروەها 1068 کەس قوربانی دەستی عەجاجن، کە لە نێوان کوشتن و رفاندن و ئەشکەنجەدان و دەستدرێژی دابەش بوون، تۆمەتباریش دانی بەوەدا ناوە کە ژمارەی زیندانیکراوەکان زیاتر لە سێ هەزار کەس بوون و هەموشیان کورد بوون.

PUKMEDIA