رێککەوتنى یەکێتى و نەوەى نوێ ئیمزاکرا

تایبەت

وێنەیەکى مەراسیمەکە

کەمێک پێش ئێستا لەلایەن بافڵ جەلال تاڵەبانى سەرۆکى یەکێتیى نیشتمانیى کوردستان و شاسوار عەبدولواحید سەرۆکى جوڵانەوەى نەوەى نوێ رێککەوتنى نێوان یەکێتى و نەوەى نوێ ئیمزاکرا، کە ئامانج لێى باشکردنى ژیان و گوزەرانى خەڵک و گەڕاندنەوەى هاوسەنگى هێزە لە هەرێمى کوردستان.

ئەمڕۆ پێنجشەممە 2ى7ى2026 لە مەراسیمى رێککەوتنى نێوان یەکێتیى نیشتمانیى کوردستان و جوڵانەوەى نەوەى نوێ شاسوارعەبدلواحید سەرۆکى جوڵانەوەى نەوەى نوێ رایگەیاند: ئەمڕۆ لە ساتێکى هەستیار و چارەنوسسازداین لە مێژووى هەرێمى کوردستان، کە ساتێکە پێویستى بە زیادکردنى ناکۆکى و تۆمەتبارکردن نییە، بەڵکو پێویستى بە ئازایەتى بڕیاردان و ویستى راستەقینە هەیە بۆ گۆڕانکارى.  

ئەوەشى خستەڕوو: ئەمڕۆ دەمانەوێت بە روونى بیڵێین کە ئەم رێککەوتنى دژى هیچ کەسێک نییە، ئێمە لە شەڕدا نین لەگەڵ هیچ حزب و لایەنێک و هیچ کەسایەتییەکدا، بەپێچەوانەوە دەستى برایەتى بۆ هەموو ئەوانە درێژدەکەین کە لە خەمى خەڵک و کوردستاندان، نەک لە خەمى پۆست و بەرژەوەندى شەخسى.

روونیشى کردەوە: بۆ هەموو هێزە سیاسییەکان و هەر لایەنێک کە باوەڕى وایە رزگار کردنى هەرێمى کوردستان ئەرکى نیشتمانییە، پێش ئەوەى قەدەرێکى سیاسى بێت، هەرچەندە رەنگە بەشێک لە سیاسیەکان بەداخەوە یەکترمان خۆشنەویستبێت یان کەیفمان بەیەکتر نەهاتبێت، بەڵام ئەگەر بتوانین لەگەل یەکتردا دابنیشین و بەرژەوەندى خەڵک بخەینە پێش بەرژەوەنى خۆمانەوە ئەوا هەموومان سەرکەوتوو دەبین، ئەگەر فریانەکەوین ئەم هەرێمە نامێنێت، ئەگەر لایەنێک بە تەنها هەموو پۆستە باڵاکانى کوردستانى لەدەستدابێت و بەرژەوەندى شەخسى و حزبى بخاتە پێش بەرژەوەندى خەڵک و هەرێم ئەوا ئەم هەرێمە نامێنێت. 

وتیشى: ئەم رێککەوتنە دەستپێکى پڕۆژەیەکە بۆ گۆڕانى شێوازى حکومڕانى لە هەرێمى کوردستان.

بێلایەنى واتا بێهەڵوێستى ناکرێت لەم دۆخە هەستیارەى هەرێم کە لەبەردەم دووڕیانێکى زۆر هەستیارداین و داهاتووى هاووڵاتیانى تێدا یەکلایى دەبێتەوە، هەندێک کەس بڵێت من قسەى تێدا ناکەم، یان من بێلایەنم. 

راشیگەیاند: پەیامى ئێمە بۆ هەموو هێزە سیاسییەکانە، دەرگاى ئێمە کراوەیە، بەخێرهاتنى هەر لایەنێک دەکەین کە دێتە ناو ئەم هاوپەیمانێتییەوە.

هەر لە مەراسیمەکەدا سەرۆک بافڵ جەلال تاڵەبانی سەرۆکى یەکێتیى نیشتمانیى کوردستان رایگەیاند: ئێمە بەڵێنەکانى خۆمان جێبەجێ دەکەین، بەڵێنماندا باڵانسى هێز دەگەڕێنینەوە بۆ کوردستان، بەم رێککەوتنە ئەمە دەکەین.

ئاماژەى بە ئەوەشدا: خەڵکى کوردستان و خەڵکى عیراق لە ئەمڕۆ بە دواوە چاوەڕێى سیاسەتێکى جیاواز بن لە کوردستان.

ئەوەى خستەڕوو: دەبێت هەموو لایەنێک بەتایبەت ئەو لایەنانەى کە لەم رێککەتنەدا نین، دان بەهەڵەکانتاندا بنێن و بەڵێن بدەن کە ئەو هەڵانە چاک بکەنەوە، پێیان عەیبە داواى لێبووردن لە میلەتەکەمان بکەن، ئەوە هەڵگرتنى بەرپرسیارێتى نییە و بەرپرسیارێتى واتا خزمەت، دەبێت خزمەتى خەڵک بکەن، نەک خەڵک خزمەتتان بکات.

راشیگەیاند: پێکهێنانى حکومەت زۆر دواکەوتووە، ساڵ و نیوێکە ئێمە دەمانەوێت حکومەتێکى باشترمان لە کوردستان هەبێت، حکومەتێک کە بتوانێت باشتر خزمەت بکات و مەسەلە پۆست نییە، بەڵکو مەسەلەکە ستراتیجە، کە سەیرى ئەم پێنج شەش ساڵەى رابردوو دەکەین لێى رازى نین.

روونى کردەوە: ئێمە حکومەتێکمان دەوێت کە جیاواز بێت لە جارەکانى دیکە، کێشەنییە لاى من لە پۆستێکدا کێ دادەنیشێت، بیروبۆچوونى حکومەتەکە گرنگە، لە دواى ریفراندۆمەوە هەموو پرسێکى ستراتیجى کە هاتوەتەى پێشەوە ئەم حکومەتە هەڵە بڕیارى داوە.

سەرۆک بافڵ وتیشى: دەرگا کراوەیە بۆ هەموولایەک، بۆ خوشک و برا ئیسلامییەکان و ئۆپۆزسیۆن و پارتى دیموکراتى کوردستانیش بۆ بەشدارى کردن لەم هاوپەیمانێتییە، مەرجەکەشى ئەوەیە هەڵەى خۆت بزانیت و داواى لێبووردن لە میلەتەمکە بکەیت و بەجۆرێکى نوێ سیاسەت بکەیت.

PUKMEDIA