ئاماری بومەلەرزەکەی ڤەنزوێلا؛ 235 گیانلەدەستدان و 1500 کەس بریندار

AFP

بومەلەرزەکەی ڤەنزوێلا

ژمارەی قوربانیانی بوومەلەرزە بەهێزەکەی ڤەنزوێلا بۆ 235 گیانلەدەستدان  و برینداربوونی هەزار و 500 کەس بەرزبووەوە و تیمە فریاگوزارییەکانیش رووبەڕووی ئاستەنگ بوونەتەوە.

ویلایەتی لا گوایرا، کە دەکەوێتە باکووری کاراکاسی پایتەخت، زۆرترین زیانی بەرکەوتووە،  گیریخواردوان لەژێر داروپەردووی باڵەخانەکاندا هاوار دەکەن و داوای دەکەن زوو بە هانەیانەوە بچن، بەڵام بەهۆی کەمیی ئامێری پێشکەوتووەوە، خەڵکی ناوچەکە ناچاربوون ئامرازی سەرەتایی بۆ لادانی کۆنکرێت و ڕزگارکردنی کەسوکاریان بەکاربهێنن.

پەیمانگای جیۆلۆجی ئەمریکی (USGS) ڕایگەیاند: بومەلەرزەی یەکەم بە گوڕی 7.2 پلە بەپێوەری ڕێختەر بووە،  دوای تەنها 39 چرکە بومەلەرزەی دووەم بە گوڕی 7.5 پلە ناوچەکەی هەژاندووە، لە دوای ئەو دوو بومەلەرزە سەرەکییەشەوە زیاتر لە 30 بوومەلەرزەی دیکە ئەو وڵاتەی هەژاند، کە پاشکۆ بوون.

لەلایەکی دیکەوە، کارلۆس ئالفارادۆ وەزیری تەندروستی ڤەنزوێلا ڕایگەیاند: تیمەکانی پزیشکی و فریاگوزاری لە ئامادەباشی تەواودان بۆ هاوکاریکردنی برینداران و گەیشتن بەو کەسانەی لەژێر داروپەردووەکانداگیریان خواردووە.

پەیوەست بە ئاماری قوربانیەکانیش، وەزیری تەندروستی ئەو وڵاتە ئاشکرای کرد: تاوەکو ئێستا 235کەس گیانیان لەدەستداوە و هەزار و 500 کەسی دیکەش برینداربوون،ئەمە جگە لەوەی سەدان کەسی دیکە بێسەروشوێنن و تیمەکان لەناو داروپەردووی خانووە رووخاوەکاندا بەدوایاندا دەگەڕێن.

PUKMEDIA