تەمەنى 16 ساڵە و بە پێنج زمان وەرگێڕان دەکات

PUKMEDIA

رۆنیا محەمەد

هەرچەندە تەمەنی كەمە، بەڵام چەندین زمانی زیندووی جیهان دەزانێت و دەڵێت: دەمەوێت خزمەت بە زمان و ئەدەبی نەتەوەكەم بكەم.

رۆنیا محەمەد رایگەیاند: تەمەنم 16 ساڵە و خوێندكاری پۆلی 11ی ئامادەییم لە خوێندنگەی (كوردجینیەسی ناحكومی) لە سلێمانی، زمانەكانی ئینگلیزی، فەرەنسی، عەرەبی، فارسی و توركی دەزانم، نووسەر و وەرگێڕم و خاوەنی دوو بەرهەمی چاپكراوم بە ناوەكانی (چیرۆكە خەیاڵییەكانی رۆنیا)، كە لە تەمەنی هەشت ساڵیدا نووسیومە،  هەروەها كتێبی (چیرۆكەكانی رۆنیا) كە لە تەمەنی 12 ساڵیدا چاپ و بڵاومكردووەتەوە، لە پاڵ وەرگێڕان و نووسیندا، لە بوارەكانی پرۆگرامسازی (پایسۆن، جاڤاسكریپت، ئێچ تی ئێم ئێڵ و سێ ئێس ئێس) كار دەكەم و شارەزاییەكی باشم هەیە.

وتیشی: دایك و باوك و براكەم و هاوڕێیەكم بە ناوی (رەزا عەلی) و هەروەها مامۆستاكانی خوێندنگەكەم و چەند نووسەرێكی دیكە هاوكار و پاڵپشت و هاندەرمن. 

دەشڵێت: لە تەمەنی پێنج ساڵییەوە سەرقاڵی زمانم و سەرەتا لە رێگەی فیلمە كارتۆنییەكان و پاشان بە هەوڵی خۆم كارم لەسەر زمانەكان كردووە و پێم باشبوو كە زمانی وڵاتانی دەوروبەر و جیهان زوو فێربم.

رۆنیا ئێستا سەرقاڵی كتێبێكی منداڵانە لە كوردییەوە بۆ فەرەنسی، ئەو ئەزموونەشی ناوازەیە، وتی: بە روونی بۆم دەركەوتووە كە وەرگێڕان لە زمانی دایكەوە بۆ زمانێكی دیكە ئاسانترە، چونكە دەتوانی باشتر وێنای وشەكان بكەی.

 لە كۆتاییدا وتیشی: بۆ داهاتوو بڕیارمداوە كتێبێك بنووسم كە زانست و تەكنۆلۆژیا و كەلتور تێكهەڵكێش بكەم بۆ منداڵان، مەبەستیشم ئەوەیە كە منداڵان لەو رێگەیەوە ناسنامەی نەتەوەیی خۆیان لە دەست نەدەن. 

 PUKMEDIA /  کوردستانى نوێ