دەنگدان بەپرۆژە بڕیاری سنوردارکردنی دەسەڵاتەکانی سەرۆک لە ئەمریکا دوادەخرێت

رۆیتەرز

پۆلیسێکی کەپیتۆڵ لە بەردەم ئەنجومەنی نوێنەران کاتی دەنگدانێکی ئەنجومەنەکە

ئەمڕۆ 22ی5ی2026، ئەنجومەنی نوێنەرانی ئەمریکا دەنگدانی لەسەر پڕۆژە بڕیارێکی تایبەت بە سنوردارکردنی دەسەڵاتەکانی سەرۆک  بۆ بەرپاکردنی جەنگ هەڵوەشاندەوە، هۆکارەکەشی بۆ ناکۆکییە ناوخۆییەکانی پارتی کۆماری دەگەڕێتەوە.

بەپێی هەواڵێکی تۆڕی هەواڵی "فۆکس نیوز"  کە لە زاری چەند سەرچاوەیەکی ئاگادارەوە بڵاویکردەوە، سەرکردایەتی پارتی کۆماری لە ئەنجومەنی نوێنەرانی ئەمریکا بڕیاریداوە ئەو دەنگدانە هەڵبوەشێنێتەوە کە بڕیاربوو لەسەر پڕۆژەیاسای دەسەڵاتەکانی جەنگ ئەنجام بدرێت.

بەپێی زانیارییەکانی ئەو سەرچاوانە، هۆکاری دواخستنی دەنگدانەکە بۆ دوورکەوتنەوە بووە لە ئەگەری دابەشبوونی ئەندامانی پارتی کۆماری لە ئەنجومەنی نوێنەران، بەوپێیەی پێشتر سێ ئەندامی کۆمارییەکان پشتگیری خۆیان بۆ پرۆژە یاساکە دەربڕی بوو، دەنگیان خستبووە پاڵ دیموکراتەکان.

پڕۆژە بڕیاری سنوردارکردنی دەسەڵاتەکانی سەرۆک، لەلایەن دیموکراتەکانەوە ئامادە کراوە و تیایدا دەیانەوێت دەسەڵاتی هەڵگیرسانی جەنگ لە سەرۆک وەربگرنەوە و سەرۆک بە راوێژ لەگەڵ کۆنگرێس و دەزگاکانی دیکە بڕیاری جەنگ بدات.

PUKMEDIA