سەردانەكەی ترەمپ بۆ چین كۆتاییهات و گەڕایەوە بۆ ئەمریكا

AFP

شی جین پینگ سەرۆکى چین و دۆناڵد ترەمپ سەرۆکی ئەمریکا

سەردانە دوو رۆژییەكەی دۆناڵد ترەمپی سەرۆكی ئەمریكا بۆ چین كۆتایی هات و  هەردوو وڵات لەسەر دروستكردنی بۆردێكی بازرگانیی هاوبەش رێككەوتن، ئەمەش بە ئامانجی رێگریكردن لە دووبارە سەرهەڵدانەوەی ناكۆكییە بازرگانییەكان كە لە ساڵانی رابردوودا زیانی گەورەی ئابوورییان لە چین و ئەمریكا داوە، سەرۆکی چینیش دەڵێت: لەسەر چەندین پرس رێککەوتووین.

 بەپێی ئامارەكان، شەڕی بازرگانی كاریگەرییەكی تووندی لەسەر قەبارەی ئاڵوگۆڕی نێوان پەكین و واشنتۆن هەبووە. لە ساڵی 2025دا، هەناردەی چین بۆ ئەمریكا بە بڕی 130 ملیار دۆلار دابەزیوە، لە بەرامبەردا، هەناردەی ئەمریكا بۆ چین بە رێژەی 25٪ كەمی كردووە و بۆ تەنیا 106 ملیار دۆلار دابەزیوە.

 تاوەكو ساڵی 2018، پێناسی گومرگی سەر كاڵای چینی لە ئەمریكا تەنیا 3.1٪ بوو، بەڵام ئەم رێژەیە لە ساڵی 2024 بۆ 10.9٪ بەرزبووەوە و لە ساڵی 2025دا ئاستێكی پێوانەیی تۆماركرد و گەیشتە 31.6٪. تەنانەت بۆ هەندێك كاڵای وەك ئەلەمینیۆم و ئاسن، پێناسی گومرگی گەیشتووەتە نزیكەی 70٪.

 سەردانی ترەمپ بۆ چین لە كاتێكدایە كە جەنگی ئێران و بەرزبوونەوەی نرخەكانی وزە، فشارێكی زۆری خستووەتە سەر ئابووری هەردوو وڵات، لای خۆشییەوە سەرۆكی چین، تەئكید لەسەر ئەوە دەكاتەوە كە هاوبەشیی نێوان هەردوو وڵات زیاترە لە جیاوازییەكانیان.

شی جین پینگ دەڵێت: كاتێك هاوكاری دەكەین هەردوولا سوودمەند دەبین، كاتێكیش ڕووبەڕووی یەك دەبینەوە هەردوولا زیان دەكەین. پێویستە چین و ئەمریكا لەبری ئەوەی ڕكابەر بن، ببنە هاوبەشی یەكدی و ڕێگەیەكی گونجاو بدۆزنەوە بۆ ئەوەی وەك دوو زلهێز پێكەوە هەڵبكەن.

ئاشکراشی کرد، لەسەر پتەوکردنی پەیوەندییەکان و هەماهەنگی بۆ پرسە هەرێمی نێودەوڵەتییەکان رێککەوتوین.

دووپاتیشی کردەوە، هاریکاری نێوان پەکین و واشنتن دەکرێت هاوکار بێت بۆ گەشەپێدانی زیاتری هەموو کەرتەکانی هەردوو وڵات.

لە کۆتایشدا، شی جین پینگ، سەرۆکی چین، رایگەیاند: چین و ئەمریکا دەتوانن گەشە بە لایەنەکانی هاریکاری هاوبەش بدەن و پێشکەوتنی بەرچاو بەدەستبهێنن.

PUKMEDIA