شەڕ و پێکدادان لە حەلەب ژمارەیەک برینداری لێکەوتەوە

ئاژانسەکان

دوو دانە لە بریندارەکانی حەلەب

لە گەڕەکی شێخ مەقسود و ئەشرەفیە لەحەلەب شەڕ و پێکدادان لە نێوان هێزە کوردییەکان و هێزەکانی حکومەتی سوریادا روویدا و بەهۆیەوە چەند کەسێک برینداربوون.

ئەمڕۆ، 12/22/2025، شەڕ و پێکدادان لە نێوان هێزەکانی ئاسایشی ناوخۆ و هێزەکانی حکومەتی سوریا لە شاری حەلەب روویدا و هێزەکانی لایەنگری حکومەت بە تۆپ و هاوەن هێرشیان کردە سەر هەردوو گەڕەکی شێخ مەقسود و ئەشرەفیە و خەڵکیان ناچارکرد ماڵەکانیان بەجێبهێڵن و بچنە شوێنێکی ئارامتر.

لە هێرشەکەی سەر بازگەی بنکەی شیهان کە هەڕەشە لە ئاسایشی شارەکە دەکات، هێزە کوردییەکان وەڵامیان دایەوە و رایانگەیاند، کە حکومەتی ئێستا ناتوانێت هەموو گروپە چەکدارەکان کۆنتڕۆڵ بکات و حکومەتیشیان بەرپرسیار کرد لەم هێرشە.

هێزەکانی ئاسایشی ناوخۆ هۆشداری دەدەنە هاووڵاتیان لە ماڵەوە بمێننەوە و دوور بن لە پەنجەرەکان، هاوکات خۆیان لە گرتنی وێنە و ڤیدیۆ بەدوور بگرن و باوەڕ بە دەنگۆی سۆشیال میدیا نەکەن و تووشی شڵەژان نەبن.

حکومەتی سوریا فڕۆکەی بێفڕۆکەوانی بەسەر هەردوو گەڕەکەکەدا جێگیرکردووە، ئەمەش بەپێچەوانەی رێککەوتنی یەکی نیسان کە لەنێوان ئەنجومەنی گشتی گەڕەکەکانی شێخ مەقسوود-ئەشرەفییە و نوێنەرانی حکومەتی سوریا ئیمزا کراوە.

بەپێی زانیارییەکان بەهۆی شەڕەکەوە دوو کارمەندی ئاسایش و پینج کەسی بێتاوان برینداربوون، کە یەکێک لە بریندارەکان منداڵە.

PUKMEDIA