بێكاری و كۆچی گه‌نجان بووه‌ته‌ مۆته‌كه‌ی ده‌ڤه‌ری راپه‌ڕ‌ین

ئاژانسەکان

بەلەمێکی کۆچبەران

زیادبوونی به‌رچاوی رێژه‌ی بێكاریی گه‌نجان له‌ ده‌ڤه‌ری راپه‌رین، بووه‌ته‌ هۆی ئه‌وه‌ی به‌ڕ‌یژه‌یه‌كی زۆر گه‌نجانی ناوچه‌كه‌ رێگه‌ی كۆچ بگرنه‌به‌رو به‌پێی نوێترین توێژینه‌وه‌ش بێكاری هۆكارێكی سه‌ره‌كیی كۆچی گه‌نجانه‌و له‌ئێستاشدا 31.38%ـی خێزانه‌كانی راپه‌ڕ‌ین هه‌ژارن یاخود له‌دۆخێكی ئابوریی خراپدا ده‌ژین.

دامه‌زراوه‌ی ڤیژن بۆ لێكۆڵینه‌وه‌ی ستراتیجی، نوێترین توێژینه‌وه‌ی به‌زمانی ئینگلیزی له‌باره‌ی بێكاری گه‌نجان له‌ده‌ڤه‌ری راپه‌ڕ‌ین و زۆری رێژه‌ی كۆچی گه‌نجان له‌ناوچه‌كه‌ به‌ناونیشانی (په‌ره‌پێدانی به‌رده‌وامی كارسازی گه‌نجان له‌ ئیداره‌ی راپه‌ڕ‌ین) بڵاوكرده‌وه‌.

توێژینه‌وه‌كه‌، باس له‌ زیادبوونی به‌رچاوی رێژه‌ی بێكاری گه‌نجان ده‌كات له‌ ده‌ڤه‌ری راپه‌ڕ‌ین و ده‌یبه‌ستێته‌وه‌ به‌ ناسه‌قامگیریی ئابوری و دامه‌زراوه‌ییه‌وه‌ له‌ناوچه‌كه‌ و گه‌یشتووه‌ته‌ ئه‌و ده‌رئه‌نجامه‌ی كه‌ 31.38%ـی خێزانه‌كانی ناوچه‌كه‌ هه‌ژارن یاخود له‌دۆخێكی ئابوریی خراپدا ده‌ژین.

هه‌ر له‌و توێژینه‌وه‌یه‌دا هۆكاره‌كانی بێكاریی گه‌نجان له‌چه‌ند ره‌هه‌ندێكی (ئابووری، كۆمه‌ڵایه‌تی، كه‌لتوری، سیاسی و یاسایی) خراونه‌ته‌ڕ‌وو، له‌ڕ‌ێگه‌ی راپرسیی مه‌یدانیشه‌وه‌ كه‌ له‌سه‌ر 462 گه‌نجی ناوچه‌كه‌ ئه‌نجامدراوه‌ گه‌یشتوونه‌ته‌ ئه‌و ده‌رئه‌نجامه‌ی كه‌ بێكاری هۆكارێكی سه‌ره‌كیی كۆچی گه‌نجانه‌و به‌شێكی زۆری به‌شداربووانی راپرسییه‌كه‌ ئه‌ندامێك یان زیاتر له‌خێزانه‌كه‌یان كۆچیان بۆ ده‌ره‌وه‌ی وڵات كردووه‌.

توێژینه‌وه‌كه‌ له‌لایه‌ن توێژه‌ران (د. دیدار عه‌بدولكه‌ریم) و (ئه‌له‌ند مه‌حوی) ئاماده‌كراوه‌ و چه‌ند پێشنیازێكیش بۆ چاره‌سه‌ر خراونه‌ته‌ڕ‌وو.

PUKMEDIA