مووچه‌ی مانگی ئه‌یلول دواده‌كه‌وێت و دوو مووچه‌ش چاره‌نوسیان نادیاره‌

PUKMEDIA

دابەشکردنی مووچە

لیستی مووچه‌ی مانگی مانگی10 ڕ‌اده‌ستی وه‌زاره‌تی دارایی حكومه‌تی فیدراڵ كراو چاره‌نوسی چه‌ند مووچه‌یه‌كی هه‌رێمیش به‌نادیاری ماوه‌ته‌وه‌، ناردنی مووچه‌ی مانگی ئه‌یلولیش ده‌كه‌وێته‌ مانگی 12وه‌.

وه‌زاره‌تی دارایی و ئابوری هه‌رێمی كوردستان له‌ راگه‌یه‌ندراوێكیدا ئاماژه‌ی به‌وه‌كردووه‌، كه‌ ئه‌مڕ‌ۆ 25ی11ی2025 لیستی مووچه‌ی مانگی تشرینی یه‌كه‌می فه‌رمانبه‌ران و مووچه‌خۆرانی هه‌رێمی كوردستان له‌لایه‌ن تیمی ته‌كنیكی وه‌زاره‌تی دارایی و ئابووری هه‌رێمی كوردستانه‌وه‌ ڕ‌اده‌ستی فه‌رمانگه‌ی ژمێریاری وه‌زاره‌تی دارایی حكومه‌تی فیدراڵ كراوه‌.

 مانگێکە مووچە دابەش نەکراوە و کاتی دابەشکردنیشی دیار نییە

راده‌ستكردنی لیستی مووچه‌ی مانگی 10، له‌كاتێكدایه‌ كه‌ مووچه‌خۆرانی هه‌رێمی كوردستان هێشتا مووچه‌ی مانگی ئه‌یلول واته‌ نۆیان وه‌رنه‌گرتووه‌ مانگێكیش به‌سه‌ر دابه‌شكردنی مووچه‌ی مانگی هه‌شتدا تێپه‌ڕ‌یوه‌، كه‌ وه‌زاره‌تی دارایی له‌ ڕ‌ۆژی دووشه‌ممه‌ 27ی10ی2025، ده‌ستی به‌دابه‌شكردنی مووچه‌ی مانگی ئابی فه‌رمانبه‌ران و مووچه‌خۆرانی هه‌رێمی كوردستان كرد و هێشتا دیارنییه‌ كه‌ی مووچه‌ی مانگی ئه‌یلول دابه‌شده‌كرێت.

ناردنی مووچەی ئەیلول پێدەچێت بکەوێتە مانگی 12وە

 لەلایەکی دیکەوە، حكومه‌تی عیراق له‌ رۆژی 16ی11ی2025وه‌ ده‌ستی به‌دابه‌شكردنی مووچه‌ی مانگی 11ی فه‌رمانبه‌رانی كردووه‌و رۆژی 1ی12ی2025 به‌ دابه‌شكردنی مووچه‌ی خانه‌نشینان و چاودێری كۆمه‌ڵایه‌تی كۆتایی به‌دابه‌شكردنی مووچه‌ دێت، ئه‌مه‌ش له‌كاتێكدایه‌ كه‌ له‌ مانگه‌كانی رابردوودا تا ته‌واوبوونی مووچه‌ی خۆیان پاره‌ییان بۆ هه‌رێم نه‌ناردووه‌، به‌م پێیه‌ش بێت تا سه‌ره‌تای مانگی داهاتوو مووچه‌ی مانگی ئه‌یلول نانێردرێت، هه‌رچه‌نده‌ وه‌زاره‌تی دارایی و ئابوری هه‌رێم ڕ‌ۆژی 19ی11ی2025، داهاتی نانه‌وتی هه‌رێم بۆ مانگی ئه‌یلول كه‌ بڕ‌ه‌كه‌ی 120 ملیار دینار بوو به‌شێوه‌ی كاش خسته‌ سه‌ر هه‌ژماری بانكی وه‌زاره‌تی دارایی حكومه‌تی فیدراڵ له‌ لقی هه‌ولێری بانكی ناوه‌ندی عیراق، بۆیه‌ ئێستا حكومه‌ت و مووچه‌خۆران چاوه‌ڕ‌وانی ناردنی ته‌مویلی مووچه‌ی مانگی ئه‌یلولن.

پەیوەست بە لیستی مووچەش، له‌ئێستادا حكومه‌تی عیراق لیستی مووچه‌ی دوو مانگی لایه‌ و پێویستیشه‌ ته‌مویلی مانگی ئه‌یلول بنێرێت، ئه‌مه‌ش له‌كاتێكدایه‌ له‌كۆتایی ساڵ نزیك ده‌بینه‌وه‌و به‌مه‌ش فه‌رمانبه‌ران ترسیان هه‌یه‌ وه‌ك ساڵانی رابردوو مووچه‌كانیان بفه‌وتێت كه‌ ساڵی رابردوو مووچه‌یه‌كیان فه‌وتاو هۆكاره‌كه‌شی بۆ ئه‌وه‌ بوو كه‌ وه‌زاره‌تی دارایی فیدڕ‌اڵی رایگه‌یاند هه‌رێم پشكی له‌بودجه‌دا نه‌ماوه‌.

بە ئەگەری  90% دوو مووچەی ئەمساڵ دەفەوتێت

لە بارەی چارەنوسی مووچەکانی ئەمساڵ  ئه‌گه‌ری زۆره‌ كه‌ دوو مووچه‌ بفه‌وتێت، هه‌روه‌ك چۆن بریكاری پێشووی وه‌زاره‌تی دارایی عیراق له‌چاوپێكه‌وتنێكی میدیایدا رایگه‌یاند: به‌ رێژه‌ی 90% ئه‌گه‌ری فه‌وتانی دوو مووچه‌ی ئه‌مساڵ بۆ مووچه‌خۆرانی هه‌رێم هه‌یه‌، ئه‌و ئه‌گه‌ره‌ كه‌مه‌ی كه‌ ماوه‌ بۆ نه‌فه‌وتانی دوو مووچه‌ی كۆتایی ئه‌مساڵ ئه‌وه‌یه‌ كه‌ به‌رپرسانی حكومه‌تی هه‌رێم پێویسته‌ فشار بكه‌ن و ئه‌و دوو مووچه‌یه‌ رزگار بكه‌ن.

PUKMEDIA