دانوستانى شێنەیی بۆ یەکلاکردنەوەی سەرۆکایەتییەکان

PUKMEDIA

دانوستانی پێکهێنلنی حکومەتی داهاتووی عیراق

لە دوای تەواوبوونی هەڵبژاردن وردە وردە قەوارە براوەکان بە نهێنی و ئاشکرا و زۆر لەسەرخۆ سەرقاڵی جموجوڵە سیاسییەکانیانن بۆ هەرچی زووە یەکلاکردنەوەی سێ سەرۆکایەتییەکە و دواتر دروستکردنی حکومەتی نوێ بێگومان پێش تەواوبونی کاتەدەستورییەکەی.


عەباس موسەوی سەرکردە لە دەوڵەتی یاسا رایگەیاند: گفتوگۆکان بە شێوەیەکی هاوتەریب بەڕێوەدەچن لەگەڵ کورد، بۆ یەکلاکردنەوەی پۆستی سەرۆککۆمار لەگەڵ سوننە و باسکردن لە بەرکەوتەکانیان لە داهاتوو، بەپێی یاساو لە چوارچێوەی دەستووردا .

هەرچی کوتلە و قەوارە سونییەکانە دوای گفتوگۆی چڕی نێوانیان گەشتنە رێککەوتن و ( ئەنجومەنی سیاسی نیشتمانی )یان پێکهێنا، کە بەکۆی هێزە سونییەکان نزیک لە 63 کورسییان بە دەستهێناوە جگە لە پێکهاتەکانی نزیک لێیان.

مخلد حازم چاودێری سیاسی پێی وایە لێکتێگەشتنەکانی سوننە سەرەتاییە و لەگەڵ دەرکەوتنی هەندێک ئاماژە بۆ کاندیدکردنی محەمەد حەلبوسی بۆ سەرۆکی پەرلەمان، هاوکات د.مەنال فنجان مامۆستای یاسا دەڵێت: رەنگە قۆناغی داهاتوو قۆناغێکی ئاسان بێت بۆ یەکلاکردنەوەی بابەتە دەستورییەکان بە نیشانەی ئەوەی ئێستا گفتوگۆکان زۆر بە هێمنی و کرانەوەیەکی سیاسی بێ وێنە لە رابردوو بەڕێوەدەچێت، کە پێشتر بە گرژی و هەڵای راگەیاندن قۆناغەکە تێدەپەڕی .

سەبارەت بە پۆستی سەرۆک وەزیران، عقیل ردێنی وتەبێژی هاوپەیمانی نەسر بە رۆژنامەی سەباحی نیمچە رەسمی راگەیاندووە، چوارچێوەی هاوئاهەنگی تا ئێستا گەورەترین کوتلەی پەرلەمانییە و  لە ناوخۆی خۆیدا ئەو پۆستە یەکلادەکاتەوە بە پێی رێککەوتنی نێوخۆیی چوارچێوەکە و لیژنە بۆ گفتوگۆکردن لەگەڵ لایەنەکان پێکهێنراوە سەبارەت بە پۆستی وەزارەتە سیادییەکان .

سەبارەت بە پۆستی سەرۆککۆمار ردێنی راشیگەیاندووە: وەک نەریتێک پۆستی سەرۆککۆمار بۆ کوردە و لەنێو کورد یەکێتیی نیشتمانیی کوردستان بە مافی خۆی دەزانێت وەک مافێکی مێژوویی خۆی و پارتی دیموکراتی کوردستانیش هەوڵی وەرگتنی دەدات کە هۆکارەکەی بۆ کێشە ناوخۆییەکانی هەرێم دەگەڕێتەوە،کە پەیوەستن بە پۆستی سەرۆکی هەرێم و سەرۆکی حکومەتی هەرێم .

سەبارەت بە  سوننە، ئەلردێنی  روونیشیکردووەتەوە، کە "ناکۆکی لە نێوان هێزەکانی (تەقدوم ، عەزم و سیادە ) هەیە سەبارەت بە محەمەد حەلبوسی کە بە گەورەترین براوەی سوننە دادەنرێت، بەڵام کاندیدکردنی رەنگە روبەڕووی چەندین کێشە ببێتەوە لەنێوان پێکهاتە جیاوازەکاندا"، ئاماژەی بەوەشکرد کە قۆناغەکە ئاڵۆزە و پێوستی بە کردنەوەی چەندین گرێ کوێرە هەیە .

یەکێتیی نیشتمانیی کوردستان بە وەفدێکی باڵا بە سەرۆکایەتی نزار ئامێدی لێپرسراوی مەکتەبی سیاسی لە بەغداد و ئەندامێتی د.خالید شوانی وەزیری دادی عیراق و رزگار حاجی حەمە لێپرسراوی مەکتەبی هەڵبژاردن لە بەغداد لەگەڵ سەرجەم هێزو قەوارە سیاسیەکان لە بەغداد کۆبوونەوە و پەیامی سەرۆک بافڵ جەلال تاڵەبانییان بە سەرجەم لایەنەکان گەیاند و گفتوگۆی تێروتەسەل لەسەر سەرجەم پێشهات و گۆرانکارییەکان کراوە و یەکێتیی نیشتمانیی کوردستانیش سورە لەسەر وەرگرتنەوەی پۆستی سەرۆککۆمار وەک مافێکی خۆی سەبارەت بە دانانی رکابەر بۆ یەکێتی لە پۆستی سەرۆککۆمار.

رزگار حاجی حەمە ئەندامی مەکتەبی سیاسی یەکێتی رایگەیاند: دانانی رکابەر بۆ پۆستی سەرۆککۆمار بەرامبەر بە یەکێتی لە بەرژەوەندی هەرێمی کوردستان نییە .
 

PUKMEDIA