قوباد تاڵەبانی: پێشنیارەكانی دیدار بەئەمانەتەوە دەدرێنە مەكتەبی سیاسی

PUKMEDIA

قوباد تاڵەبانی

قوباد تاڵەبانی رایدەگەیەنێت: "پێشنیارەكانی دیدار بەئەمانەتەوە دەدرێنە مەكتەبی سیاسی یەكێتی و پەسند دەكرێن، بەشێكیشیان پێویستیان بەگۆڕینی یاساو رێنمایی دەبێت"، راشیدەگەیەنێت: "دیدار داهێنانێكە بۆ سیاسەتكردن لەهەرێمی كوردستان و ئەم داهێنانەش هەر لەیەكێتی جوانە".

قوباد تاڵەبانی سەرپەرشتیاری دیداری یەكێتی، ئەمڕۆ پێنجشەممە 24-4-2025، وتاری كۆتایی دووهەمین دیداری یەكێتی خوێندەوەو رایگەیاند: "یەكێتیی نیشتمانیی كوردستان حزبی تەنها كەسێك و ناوچەیەك نییە، بەڵكو حزبی یەك بەیەكی ئێوەی تێكۆشەرو گەنجان و ژنانەو سەرجەم راپۆرتی لیژنەكانیش كە لەلایەن سەرۆكی لیژنەكانەوە كۆكراونەتەوەو پڕن لەڕاسپاردەو و بۆچوون و پێشنیاری ئێوە، بەئەمانەتەوە دەدرێنە مەكتەبی سیاسی یەكێتی و پەسند دەكرێن".

راشیگەیاند: "هەندێك لەڕاسپاردەكان لەچوارچێوەی دەسەڵات و ئیرادەی یەكێتیدایەو وەك خۆیان جێبەجێ دەكرێن، بەڵام رەنگە هەندێك لەڕاسپاردەكان پێویستیان بەگۆڕینی یاسا بێت، بۆ ئەمەش دەتوانین لەڕێگەی پەرلەمانتارەكانمانەوە لەپەرلەمانی كوردستان كاریان بۆ بكەین، هاوكات رەنگە هەندێك لەڕاسپاردەكان پێویستیان بەگۆڕینی رێنمایی و بڕیاری حكومی بێت و هەموو ئەمانەش لەپێكهێنانانی حكومەت و پەیڕەوكردنی بەرنامەی حكومەتدا هاوكارمان دەبن"، ئەوەشی وت: "دوای پەسندكردنی راسپاردەكانی دیدار، لیژنەیەك بۆ بەدواداچوون بۆ چۆنێتی جێبەجێكردنی بڕیارەكان پێكدەهێنین".

سەرپەرشتیاری دیداری یەكێتی ئەوەشی راگەیاند: "دیدار داهێنانێكە بۆ سیاسەتكردن لەهەرێمی كوردستان و ئەم داهێنانەش هەر لەیەكێتیی نیشتمانیی كوردستان جوانە، بۆیە داواتان لێدەكەین دوای دیداریش بەردەوامبن لەگفتوگۆو كۆبوونەوەكانتان، بەشێوەیەك ژیانی حزبایەتی زیندوو بكەنەوەو رۆژانە گوێبیستی داواكاری خەڵكبن، ئێمەش هاوكارو پشتیوانتان دەبین".

لەكۆتایی وتارەكەیدا قوباد تاڵەبانی سەرپەرشتیاری دیداری یەكێتی ئاماژەی بەوەشكرد: "پێویستە بەڵینەكانی هەڵبژاردن ببەینەسەرو ئەو كەسانەی لێمان زویربوون ئاشتیان بكەینەوە، وەك چۆن پڕۆسەی سیاسی و هەڵبژاردن ناوەستن، نابێ ئیمەش بوەستین".

رۆژی چوارشەممە 23-4-2025 دووهەمین دیداری گشتی یەكێتییی نیشتمانیی كوردستان، بە ئامادەبوونی بافڵ جەلال تاڵەبانی سەرۆكی یەكێتی و بەسەرپەرشتی قوباد تاڵەبانی سەرپەرشتیاری دیداری یەكێتی و بە بەشداری سەرۆككۆماری عیراق و سەرجەم ئەندامانی مەكتەبی سیاسی و سەركردایەتی و ئەندامان و لایەنگرانی یەكێتیی نیشتمانیی كوردستان لە هۆڵی یانەی پێشمەرگە لەسلێمانی بەڕ‌ێوەچوو، ئەمڕۆش كە كۆتا رۆژی دیدارەكەیە لیژنەكان كە پێكهاتوون لەلیژنەكانی (ژنان، پەیكەر و ئۆرگانەكانی حزب، گەنجان، پەیوەندییەكان، حكومەت، ناوچە دابڕ‌ێنراوەكان و ماددەی 140، پێشمەرگە و تێكۆشەرە دێرینەكان و شەهیدان) گفتوگۆو كارەكانی خۆیان ئەنجامدەدەن.

پێشتر یەكێتیی نیشتمانیی كوردستان بۆ ئەنجامدانی دووهەمین دیداری گشتی یەكێتی 9  كۆنفرانسی ئامادەكاری لەشارەكانی ‌(موسڵ، بادینان، هەولێر، كۆیه، كەركوك، هەڵەبجە، سلێمانی، گەرمیان، ئیدارەی راپەڕ‌ین)ئەنجامداو زیاتر لە 12 هەزار و 500 ئەندام و لایەنگری یەكێتی بەشدارییان تێدا كرد.


PUKMEDIA