138 چاپخانەی بڵاوکراوەی کاغەزی لە سلێمانی کاردەکەن

PUKMEDIA

چاپخانەی کوردستانی نوێ

چاپخانە پێویستییەکی سەرەکی دەرچوواندن و چاپکردنی رۆژنامە و بڵاوکراوەی کاغەزییە، شاری سلێمانی و دەوروبەری خاوەنی 138 چاپخانەی هەمە چەشن و قەبارەی جیاوازە، سەرچاوەیەکیش لە بەڕێوەبەرایەتی چاپ وبڵاوکردنەوەی سلێمانی رایدەگەیەنێت:" هیچ چاپخانەیەک ناتوانێت بەبێ مۆڵەت کاربکات، ژمارەی چاپخانەش لەسلێمانی زۆربوون و لەبواری جیاوازدا کاری چاپ دەکەن".

باشترین دەرفەتی رۆژنامە لە سلێمانی بووە

ئەریوان سیوەیلی بەرێوەبەری چاپ و بڵاوکردنەوەی سلێمانی بە PUKMEDIA ی راگەیاند:" لەرووی چاپخانەوە سلێمانی گەشەی کردووە و ئەمەش زەمینەی لەباری بۆ بڵاوکراوەی کاغەزیی رەخساندووە و پێشتریش باشترین دەرفەتی رۆژنامە لەم شارەوەبووە و زۆرتین رۆژنامەی حزبی و ئەهلیش هەر لەم شارە بووە".

"تائێستا 138 چاپخانە لە بەڕیوەبەرایەتی چاپ و بڵاوکردنەوەی سلێمانی مۆڵەتیان پێدراوە و کاردەکەن، کە بەشێکیان لە بواری گۆڤار و رۆژنامەو کتێب کاردەکەن، بەشێکی دیکەشیان چاپخانەی بواری بازرگانین کە چاپ لەبواری بەرهەمەکان دەکەن، وەک چاپی ریکلامی و لۆگۆی بازرگانی لەسەر بەرهەمەکان".

بەگوێرەی زانیارییەکانی سەندیکای رۆژنامەنوسانی کوردستان زیاتر لە 1000 رۆژنامە و گۆڤار مۆڵەتی رەسمیان وەرگرتووە، لە ئێستادا تەنیا 12 رۆژنامە و نزیکەی 30-40 گۆڤار دەردەچن.

کوردستانی نوێ یەکەمین رۆژنامەی کوردی دوای راپەڕینە

رۆژی 22/4/2025 یادی 127 ساڵەی دەرچواندنی رۆژنامەی کوردستان دەکاتەوە کە یەکەمین رۆژنامەی کوردییە و لە هەرێمی کوردستانیش رۆژنامەی کوردستانی نوێ یەکەمین رۆژنامەی کوردی دوای راپەڕینە و خاوەنی یەکەمین مۆڵەتی کارکردنە لەوەزارەتی رۆشنبیری هەرێمی کوردستان.

یەکەمین رۆژنامەی کوردی (کوردستان) گەورەترین کێشەی سەرەکی تەکنیکی چاپخانەبووە و بۆیە یەکەم ژمارەی لە قاهیرە و دواتر چەند ژمارەیەکی لە سویسراو دووبارە چەند ژمارەیەکی لە قاهیرە و تاراوگە دەرچووە.

لۆگۆی سلێمانی و یونسکۆ ئاوێزانی یەکبوون

سلێمانی لەلایەن پەرلەمانی کوردستانەوە لە ساڵی 2012 بە پایتەختی رۆشنبیری ناسێندراوە و رۆژی 21ی حوزەیرانی 2020 رێکخراوی یونسکۆ لۆگۆی شاری سلێمانی وەک شاری داھێنەری ئەدەب پەسەند کرد و مۆری لۆگۆی رەسمی خۆی خستەسەر، بەوەش لۆگۆی سلێمانی و یونسکۆ ئاوێزانی یەکبوون.

پێشتر لە رۆژی 31ی تشرینی یەكەمی 2019، رێكخراوی یونسكۆ، شاری سلێمانی بەشاری داهێنەری ئەدەب‌ و شاری سنەی رۆژهەڵاتی بەشاری داهێنەری موزیكناسی دیاریکرد.

PUKMEDIA