خاچی سور: مین لەعیراق زیاترلە 2000 کم چوارگۆشە داگیردەکات

ئاژانسەکان

پاشـاوەی مین و تەقەمەنی لە عیراق

خاچی سور لە عێراق ئاشكرایکرد کە مین و پاشماوەی تەقەمەنییەکانی جەنگ ڕووبەری دوو هەزار و 100 کیلۆمەتر چوارگۆشە لە عێراقدا دەگرێتەوە، هەروەها هۆشداریشی داوە لە گیانلەدەستدان و برینداربوونی لانیکەم 78 کەس لە نێوان ساڵانی 2023 بۆ 2024.

لیژنەی خاچی سوری نێودەوڵەتی لە عیراق لە بەیاننامەیەکدا رایگەیاند: "مین و پاشماوەی تەقەمەنییەکانی جەنگ ڕووبەرێک دەگرێتەوە کە بە دوو هەزار و 100 کیلۆمەتر چوارگۆشە لە عێراقدا مەزەندە دەکرێت، کە یەکسانە بە نزیکەی 300 هەزار یاریگای تۆپی پێ، کە مەترسییەکی بەردەوام بۆ سەر ژیانی مەدەنییەکان دروست دەکەن، ڕێگری لە گەڕانەوەی خێزانە ئاوارەکان دەکەن، دەستڕاگەیشتن بە زەوییە کشتوکاڵییەکان سنووردار دەکەن و هەوڵەکانی ئاوەدانکردنەوە خاو دەکەنەوە".

"لەنێوان ساڵانی 2023 بۆ 2024 بەگشتی 78 کەس کوژراون و بریندار بوون بەهۆی مینەوە، سەرەتای ساڵی 2025یش لە ئەنجامی تەقینەوەی پاشماوەی جەنگ لە ناحیەی ئەبو ئەلخەسیب سەر بە پارێزگای بەسرە سێ خوێندکار بە شێوەیەکی کارەساتبار گیانیان لەدەستداوە"، خاچێ سور وادەڵێت.

ئاماژە بەوەش کراوە: "لیژنەکە بەردەوامە لە پێشکەشکردنی خولی ڕاهێنان لەسەر هۆشیاری مەترسییەکانی مین و ڕەفتاری سەلامەت بۆ ئەو کەسانەی لەناوچە پیسبووەکان بە میندا دەژین، بە ئامانجی راهێنانیان و خۆپاراستن لەمەترسییە شاراوەکان، تەنها لە ساڵی 2024 دا نزیکەی 6 هەزار کەس کە لە ناوچە مەترسیدارەکان یان ناوچە زیانلێکەوتووەکاندا دەژین سوودمەند بوون لە چالاکییەکانی پێدانی هۆشیاری کەسی".

ئەوەش هاتووە: "لیژنەکە بەردەوامە لە کارکردن لەگەڵ هاوبەشەکانی لە ئۆپەراسیۆنەکانی پاککردنەوەی مین و لە ساڵی 2024 دا دوو هەزار و 440 پارچە ئامێر و کەرەستەی مرۆیی چالاکیی مین بەخشرایە دامەزراوە نیشتمانییەکانی چالاکیی مین و بەڕێوەبەرایەتییەکانی بەرگری شارستانی بۆ پشتیوانیکردن لە هەوڵەکانیان".

PUKMEDIA