فه‌همی بورهان: كۆنفرانسه‌كان بۆ دووهه‌مین دیداری یه‌كێتی به‌رده‌وامده‌بن

PUKMEDIA

فەهمی بورهان

لیژنه‌ی باڵای كۆنفرانسی دووهه‌مین دیداری یه‌كێتی تاوتوێی كۆنفرانسه‌كانی موسڵ و دهۆك و كۆیه‌و هه‌ولێر ده‌كات و شوێنی پێنجه‌مین كۆنفرانسیش دیاریی ده‌كات.

فه‌همی بورهان لێپرسراوی سكرتارییه‌تی دووه‌هه‌مین دیداری یه‌كێتی له‌ لێدوانێكیدا به‌ وێبسایتی ره‌سمی یه‌كێتیی نیشتمانیی كوردستان PUKMEDIA ی راگەیاند:" سبه‌ی یه‌كشه‌ممه‌ لیژنه‌ی باڵای ئاماده‌كاری كۆنفرانس له‌سلێمانی بۆ دوو مه‌به‌ست كۆده‌بنه‌وه‌، كه‌خۆی له‌تاوتوێكردنی كۆنفرانسه‌كانی موسڵ و دهۆك و هه‌ولێر و كۆیه‌ ده‌بینێته‌وه‌، هه‌روه‌ها بڕ‌یارده‌ده‌ین كه‌ كۆنفرانسی پێنجه‌م له‌كوێ ئه‌نجام بدرێت".

"دووهه‌مین دیداری یه‌كێتی به‌ دوو قۆناغ به‌ڕ‌ێوه‌ده‌چێت، له‌قۆناغی یه‌كه‌مدا ئاماده‌كارییه‌كانن كه‌خۆی له‌ ئه‌نجامدانی كۆنفرانسه‌كان ده‌بینێته‌وه‌، هه‌روه‌ها له‌قۆناغی دووه‌میشدا دیداری گشتی به‌ڕ‌ێوه‌ده‌چێت، كه‌ ته‌واو جیاواز ده‌بێت له‌ كۆنفرانسه‌كان". فه‌همی بورهان وایوت.

راشیگه‌یاند:" دووهه‌مین دیداری گشتی یه‌كێتی به‌به‌شداری میوانانی  ناوخۆیی و ده‌ره‌وه‌ ده‌بێت، به‌ڵام له‌ئێستادا كاته‌كه‌ی دیارینه‌كراوه‌، چونكه‌ هێشتا كۆنفرانسی كه‌ركوك و گه‌رمیان و سلێمانی و زۆر شوێنی دیكه‌ ماوه‌، كه‌ پێویسته‌ ئه‌م ناوچانه‌ش كۆنفرانس بكه‌ن".

ئەمەش لە کاتێکدایە، رۆژی15ی 2ی 2025 لە موسڵ دووهەمین دیداری یەکێتی دەستی بە کارەکانی کرد و  پاشان لە رۆژی 20ی 2ی2025 لە پارێزگای دهۆک و دواتر لە 26ی 2 لە کۆیە و 27ی 2ی 2025 لە هەولێر کۆنفرانسی دیدارەکە بەڕێوەچوو.

بە گوێرەی پەیڕەوی ناوخۆی پەسندكراوی كۆنگرەی پێنجەم، دیداری یەكێتی چالاكییەكی رەسمی دەورییەو بەشێكە لە وێستگەكانی خەباتی فراوانی هەڤاڵانە، هاوكات یەكەم دیداری یەكێتی بەسەرپەرشتی قوباد تاڵەبانی لە بەرواری 12-3-2022 دەستپێكردو لە 31-5-2022 كۆتایی بەكارەكانی هێناو سیاسەتەكانی یەكێتی لە بوارە جیاجیاكاندا داڕشت و بووە بنەمایەك بۆ سیاسەتی گشتی یەكێتی.

PUKMEDIA