رێکخراوێکی تەکنەلۆجیا بۆ ئاشتی راستی تۆمارە دەنگیەکەی سەرۆک بافڵ و قوباد تاڵەبانی بڵاودەکاتەوە

هەژماری تەکنەلۆجیا بۆ ئاشتی

پشکنینی تۆمارە دەنگییەکە و ئاشكرابوونی کە بە زیرەکی دەستکرد دروستکراوە

رێکخراوێکی تەکنەلۆجیا بۆ ئاشتی کە هاوبەشی رەسمی مێتایە، پەردەی لەسەر راستی تۆمارە دەنگییە فەیکەکەی لیژنەی باڵای هەڵبژاردنی پارتی دیموکراتی کوردستان و میدیاکانی ئەو حزبەی لادا و رایگەیاند: "ئەو تۆمارە دەنگەی بەناوی (بافڵ تاڵەبانی و قوباد تاڵەبانی) بڵاوکرایەوە بەژیری دەستکرد دروستکراوە.

رێکخراوی تەکنۆلۆجیا بۆ ئاشتی (التقنية من أجل السلام) و لێدوان و راگەیەندراوەکانی باوەڕپێکراون لە ئەکاونتی رەسمی خۆی لە تۆڕی کۆمەڵایەتی فەیسبووک بڵاویکردۆتەوە: "ئەو دەنگەی چەند رۆژێک پێش ئێستا بڵاوبووەوە کە بازرگانی پێوەکرا لەنێوان بافڵ تاڵەبانی و قوباد تاڵەبانی دەنگێکی زیرەکی دەستکردە".

لیژنەی باڵای  هەڵبژاردنی پارتی دیموکراتی کوردستان، تۆمارێکی دەنگی بڵاوکردەوە و گوایە گفتوگۆى نێوان بافڵ جەلال تاڵەبانى و قوباد تاڵەبانییە و هەر زوو یەکێتیی نیشتمانیی کوردستان تۆمارەکەى رەتکردەوە و راگەیاند: "بەژیریى دەستکرد دروستکراوە"، بەڵام میای رەسمی و سێبەرە و پارەدارەکراوەکانی پارتی کەوتنە بڵاوکردنەوەی ئەو تۆمارە فەیک و دروستکراوە.

سەرۆک بافڵ جەلال تاڵەبانى سەرۆکى حیزبەکە لە کەرنەڤاڵى بانگەشەى لیستی ١٢٩ی یەکێتی لە گەرمیان وتى: "تۆمارە دەنگییەکە بە بەرنامەیەکى 10 دۆلارى دروستکراوە".

 پێشتریش قوباد تاڵەبانی  سەرپەرشتیارى سکرتاریەتی مام جەلال لەبارەى تۆمارە دەنگییەکەوە رایگەیاند: "هەر کەسێک تۆزێك عەقڵی هەبێت دەزانێت ئەسڵ و ئەساسی نییە، پارتی لە هەڵبژاردن رۆحی چووە و دەست بۆ پووشێکیش دەبات".

کاروان گەزنەیی  وتەبێژى لیستى ١٢٩ی یەکێتیى لە کۆنفرانسێکى رۆژنامەوانیدا رایگەیاند: "ئەو تۆمارە دەنگییە بەژیرى دەستکرد دروستکراوە و بەئاسانترین شێوە دروستدەکرێت"، وتیشى: "پەنابردن بۆ ئەم جۆرە کارانە شیرازەى کۆمەڵایەتى تێکدەدات"، داواشى لە داواکارى گشتى کرد بێتەدەنگ.

PUKMEDIA

بڵاوکراوەکەی رێکخراوی تەکنۆلۆجیا بۆ ئاشتی کە لە هەمان کاتدا ڤیدۆیەکی دیکەیان بە زانیاری دەستکرد دروستکردووە.