ئەمین بابەشێخ : سیاسەتی یەکێتیی بۆ رۆژئاوای کوردستان یەکڕیزی نێوان لایەنەکانە

کۆبوونەوەی لێپرسراوی مەکتەبی پەیوەندیەکانی یەکێتیی نیشتمانیی کوردستان و سەرۆکی رەوتی ئازادی کوردستانێ و جێگری رەوت

نیوەڕۆی ئەمڕۆ لەبارەگای مەکتەبی سیاسی لە سلێمانی، هەڤاڵ ئەمین بابەشێخ  ئەندامی مەکتەبی سیاسی و لێپرسراوی مەکتەبی پەیوەندیەکانی یەکێتیی نیشتمانیی کوردستان بە ئامادەبونی هەڤالان سالار سەرحەد ئەندامی سەرکردایەتی و ژمارەیەک لە ئەندامانی مەکتەب، پێشوازی کرد لەبەڕێزان سیامەند حاجۆ سەرۆکی رەوتی ئازادی کوردستانێ و دکتۆر تارق جێگری رەوت.

لەکۆبونەوەکەدا هەڤاڵ ئەمین بابەشێخ بە وەفدی میوانی راگەیاند: ئێمە بارودۆخی بزاڤی رزگاریخوازی گەلی کورد لە رۆژئاوا بەرزدەنرخێنین و هیواخوازین زمانی گفتوگۆ و لێکتێگەیشتن لەو پارچەیەی کوردستان پەرەی پێبدرێت و هەمووان کار بۆ پتەوکردنی بنەمای  کاری پێکەوەیی بکەن تاکو بتوانرێت لە ئاست ئەوهەڕەشە و مەترسیانەی کە لەسەرناوچەکە هەیە یەک دەنگ و یەک  هەڵوێست بن.

لێپرسراوی مەکتەبی پەیوەندیەکانی یەکێتیی نیشتمانیی کوردستان ئاماژەی بەوەدا: یەکێتی هەمیشە ویستویەتی هاریکاربین بۆ هەر هەنگاوێکی ئەرێنی کە لەبەرژەوەندی گەلەکەمان بێت لەوبەشەی کوردستان و هەموو ئومێدێکمان پارێزگاری کردنە لەو قەوارەیەکە بەڕێککەوتن و هەماهەنگیی لایەن و پێکهاتەکان دێنەدی.

ئەمین بابەشێخ بۆ وەفدی میوانی دووپاتکردەوە: وەک چۆن لەسەرەتاى رووداوەکانی سوریا و رۆژئاوا یەکێتیی نیشتمانیی کوردستان لەڕووی مرۆییەوە دەرگای ئاوەڵابوە بۆ هاریکاریی وبەدەنگەوە هاتنی ئاوارە و لێقەوماوەکان، ئاوهاش لەم قۆناغ و بارودۆخەدا هەڵوێستمان بەو جۆرەیە و بەهیچ جۆرێک لەگەڵ ئەوەدا نین کوردی هیچ پارچەیەک لە پارچەیەکی تر لەناکۆکی نێوان لایەنەکان بەکار بهێنرێن.

هەر لەکۆبونەوەکەدا سیامەند حاجۆ سەرۆکی رەوتی ئازادی کوردستانێ ئاماژەی دا بەوەی: لەسەرەتای دامەزراندنی رەوتەکەیانەوە کاریان بۆ خەباتی پێکەوەیی کردوە لە رۆژئاوای کوردستان وبەرژەوەندی گەلی کوردیان لەسەروو هەموو بەرژەوەندیەکەوە داناوەو هەمیشە بڕوایان بەوە بوە کە دانوساندنی ( کوردی – کوردی) ئامانجێکی لە پێشینەو گرنگیان بوە بۆ رۆشنکردنەوەی ئەو ئایندە ناڕوونەی کە رووی لە رۆژئاوا کردووە.

سەرۆکی رەوتی ئازادی کوردستانێ ئەوەی راگەیاند: دابەشبوونی سیاسی لە رۆژئاوا کێشەو گرفتێکە و پێویستی بەچارەسەرێکی یەکلاکەرەوەیە ئەگەر هەنگاوی جدی بۆ ئەو پرسە نەنرێت هەموان زەرەمەند دەبن، بۆیە رەوتەکەیان گشت هەوڵێکی لە پێناوی یەکڕیزی لە رۆژئاوای کوردستاندا خستۆتەگەڕ.