سەرۆك كۆمار و سەرۆك وەزیران چەند پرسێكی گرنگ تاوتوێ دەكەن

د. لەتیف جەمال رەشید سەرۆك كۆماری عیراق و محەمەد شیاع سودانی سەرۆك وەزیرانی عیراق

د. لەتیف جەمال رەشید سەرۆك كۆماری عیراق، لە كۆشكی سەلام لە بەغدا پێشوازی لە محەمەد شیاع سودانی سەرۆك وەزیری عیراق كرد و ئەنجامی بەشداری عیراق لە كۆبونەوەی باڵای جەزائیر و شەرم شێخ و چەند بابەتێكی گرنگی دیكەيان تاوتوێ كرد.

 لە سەرەتای كۆبوونەوەكەدا، سەرۆك كۆمار بەوردی ئەنجامی بەشداریكردنی لە كۆبوونەوەی باڵای وڵاتانی عەرەبی كە لە جەزائیر بەڕێوەچوو و هەروەها كۆنفرانسی باڵای كەشوهەوای نەتەوە یەكگرتووەكان كە لە شەرم شێخی كۆماری میسر عەرەبی سازكرا، خستەڕوو.

 لەو كۆبونەوەیەدا، هەردوولا باسیان لە دەرئەنجامی دوو كۆبونەوە باڵاكەی میسر و جەزائیر كرد ، ئەو دیدارانەشیان تاوتوێكرد كە لە نێوان سەرۆك كۆمار و سەركردەی وڵاتانی برا و دۆست و سەرۆكی وەفدەكان سازكرابوو . 

 هەر لەو كۆبونەوەیەدا، چەند مەسەلەیەكی پەیوەست بە دۆخی گشتی وڵات تاوتوێ كران و جەخت كرایەوە لەسەر پێویستی پشتیوانیكردنی ھەنگاوەكانی حكومەت لەچوارچێوەی بەرنامەی كاری خزمەتگوزاریی كە دەبێتە هۆی باشتركردنی دۆخی ئابووری و بەدیھێنانی خواستی گەل بۆ ژیانێكی ئازاد و شكۆمەند.

هاوكات گرنگی بەگژداچونەوەی گەندەڵی و دروستكردنی كەشێكی گونجاو بۆ وەبەرهێنان دوپاتكرایەوە كە هانی كەرتی تایبەت دەدات بۆ ئەوەی ڕۆڵی خۆی بگێڕێت لەپاڵپشتیكردنی ئابووریی نیشتمانی و ڕەخساندنی دەرفەتی كار بۆ خستنەگەڕی وزەی گەنجان.

 هەر لەو دیدارەدا، سەرۆك كۆمار و سەرۆك وەزیران گفتوگۆیان كرد دەربارەی كێشەی ئاو، هەردوولا ڕێككەوتن لەسەر هەماهەنگییەكی تەواو بۆ دۆزینەوەی ڕێگەچارەی گونجاو و درێژەدان بە كۆبوونەوەی هاوشێوە، هەروەها دانانی بەرنامەی كار بۆ ئەوەی سەرۆك كۆمار سەردانی مەیدانی بۆ چەند پارێزگایەك بكات بە هاوەڵی ژمارەیەك لە وەزیرەكانی حكومەت.

PUKMEDIA