ئەڵمانیا رەزامەندی لەسەر مانەوەی هێزە سەربازییەكانی لە عیراق و هەرێم دەدات

لە كۆتایی هەفتەی رابردوودا پەرلەمانی ئەڵمانیا (بوندستاگ) بەزۆرینەی دەنگ بڕیاری درێژكردنەوەی ماوەی مانەوەی هێزە سەربازییەكانی دا لە عیراق و هەرێمی كوردستان لە چوارچێوەی هەماهەنگی و هاوپەیمانی نێودەوڵەتی بۆ بەرەنگاربوونەوەی رێكخراوی تیرۆرستی داعش. 

ئەڵمانیا و وڵاتانی جیهان درك بە بەردەوامبوونی مەترسی و هەڕەشەی رێكخراوی تیرۆرستی داعش بۆ سەر گەلانی عیراق و هەرێمی كوردستان و كۆمەڵگای نێودەوڵەتی دەكەن، هەرلەبەر ئەوە بڕیاری درێژەپێدانی مانەوەیان ساڵانە نوێدەكەنەوە و بەڵێنیان بۆ داكۆكیكردن و پاراستنی ئاسایش و ئەمنییەتی هەرێم و ناوچەكە بەزەروور دەزانن. 

جێی ئاماژەیە كە وەفدی یەكێتیی نیشتمانیی كوردستان لە سەرەتای هەفتەی رابردوودا، لە میانی بەشداریكردنی لە كۆنفڕانسی پرۆگرێسیڤ ئەلایەنس لە بەرلینی پایتەختی ئەلمانیا و لەسەر زاری سەرۆكی وەفدەكە سەعدی ئەحمەد پیرە، ئەندامی مەكتەبی سیاسی، لە وتاری رەسمیدا ئاماژەی بەگرنگی و زەرورەتی بڕیاردان لەسەر درێژكردنەوەی مانەوەی هێزی سەربازی ئەلمانیادا. هەروەها داواشیكرد ئەندامانی حیزبە سۆشیالیستەكان لە پەرلەمانی ئەلمانیا بە (بەڵێ) دەنگ بدەن بۆ بڕیاری مانەوەیان. 

PUKMEDIA