قوباد تاڵەبانی بۆ سەرۆک کۆمار: دەبیتە پشتیوانێکی پڕ بایەخ بۆ ئارامی و سەقامگیری عیراق

ئەرشیف

جێگری سەرۆکی ئەنجومەنی وەزیران لە پەیامێکدا پیرۆزبایی لە سەرۆک کۆماری نوێی عیراق دەکات و هیوا خوازە گەلی عیراق لەسایەی سەرۆکایەتی د. لەتیف رەشید_دا ئەو قۆناغە دژوارە کۆتایی پێبێنێت.

دەقی پەیامی قوباد تاڵەبانی:

قوباد تاڵەبانی پیرۆزبایی لە سەرۆککۆماری نوێی عیراق دەکات

بەڕێز دکتۆر لەتیف رەشید سەرۆک کۆماری عێراق

خۆشحاڵم دڵسۆزانەترین پیرۆزباییتان ئاڕاستە بکەم بۆ ئەو متمانەیەى کەئەندامانی ئەنجومەنی نوێنەران بە ئێوە و بە یەکێتیی نیشتمانیی کوردستانی بەخشی و هەڵبژێردران بەسەرۆک کۆمارى عێراق.

دڵنیام هەڵبژاردنتان بۆ ئەم پۆستە گرنگە دەبێتە پشتیوانێکی پڕ بایەخ بۆ رەخساندنی ئارامی و سەقامگیری لەعێراق و بەدەستهێنانەوەى پێگە و رۆڵى خۆی لەناوچەکەدا، هیواداریشم گەلى عێراق لەسایەى سەرۆکایەتی ئێوەدا ئەو قۆناغە دژوارە کۆتایی پێ بهێنێت و ببێتە دەستپێکێکی خێر بۆ قۆناغێکی نیشتمانی نوێ کە هەوێنی یەکگوتارى و یەکریزی نێوان پێکهاتەکان بێت.

ئەزموونى ئێوە لەسەردەمى خەباتی سیاسی جێى شانازییەکی گەورەیە بەتایبەت رۆڵى میحوەریتان لەسەردەمى ئۆپۆزسیۆنی عێراقی کە باشترین نوێنەرایەتی یەکێتیی نیشتمانیی کوردستانتان کرد، لەکایەى حوکمڕانی و بەرێوەبردنیشدا و لەیەکەم حکومەتى هەڵبژێردراوی دواى پرۆسەى ئازادی عێراق، متمانەى سەرۆک مام جەلال-تان پێ بەخشرا و بوونە وەزیرى سەرچاوەکانی ئاو لەحکومەتى فیدراڵ.

گرتنە ئەستۆى ئەم بەرپرسیارێتییە نوێیە وەک سەرۆک کۆمارى عێراقی فیدراڵ، شایستەی ساڵانی خەبات و سیاسەت و ژیریی ئێوەیە کە دواجار ئەمڕۆ گەیشتنە لوتکەى حوکمڕانی لەعێراقدا.

قوباد تاڵەبانی
جێگری سەرۆکی ئەنجومەنی وەزیران

PUKMEDIA