بەشداربوانی لوتكەی جدە پشتیوانی خۆیان بۆ سەقامگیری عیراق راگەیاند

سەركردەكانی بەشداربوو لەلوتكەی جدە لەوڵاتی سعودیە ئەمڕۆ شەممە راگەیەنراوێكی هاوبەشیان بڵاوكردەوەو تێیدا جەختیانكردەوە كە بەردەوام دەبن لەسەر بەهێزكردنی هاوكاری و هەماهەنگی و راوێژ لەنێوان وڵاتەكانیان لەسەرجەم سێكتەرەكانداو پێشوازیش لەرۆڵی ئەرێنی عیراق دەكەن لەناوچەكەدا.
ئەمەش دەقی راگەیەنراوی كۆتایی لوتكەی ئاسایش و گەشەپێدانی جدەیە كە 22 خاڵ لەخۆ دەگرێت كە بریتین لە:
* لەسەر بانگهێشتی شا سەلمان كوڕی عەبدولعەزیز ئال سعود پادشای سعودیە، سەركردەكانی وڵاتانی ئەنجومەنی هاریكاری كەنداو و شانشینی ئۆردنی هاشمی و كۆماری عەرەبی میسرو كۆماری عیراق و ولایەتە یەكگرتووەكانی ئەمریكا لە 16ی تەموزی 2022 دا لوتكەی هاوبەشیان لەشاری جەدە لەوڵاتی سعودیە ئەنجامدا بەئامانجی جەختكردنەوە لەسەر هاوبەشی مێژوویی خۆیان و قووڵكردنەوەی هاوكارییە هاوبەشییەكانیان لەسەرجەم سێكتەرەكان.
* سەركردەی وڵاتانی بەشدار بوو پێشوازییان لەجەختكردنەوەی سەرۆك بایدن كرد لەبارەی  ئەو گرنگییەی كە ئەمریكا دەیدات بە شەراكەتی ستراتیژی دەیان ساڵەی خۆی لەرۆژهەڵاتی ناوەڕاست و پابەندبوونی بەردەوامی ئەمریكا بەئاسایشی هاوبەشەكانی خۆی و بەرگریكردن لەخاكیان و هەروەها هۆشیارییان لەبارەی رۆڵی ناوەندییان لەناوچەكە لەبەستنەوەی هەردوو زەریای هیندی و ئەتڵەسی بە ئەوروپاو ئەفریقیاو ئەوروپاوە.
 * سەركردەكانی بەشداربووی كۆنگرە دیدی هاوبەشیان بۆ ناوچەیەكی ئارام و خۆشگوزەران دووپاتكردەوە.
* سەرۆك بایدن جارێكی تر جەختیكردەوە لەسەر پابەندبوونی وڵاتەكەی بەكاركردن لەپێناوی ئاشتییەكی دادپەروەرو هەمەلایەنە لەرۆژهەڵاتی ناوەڕاست، هەروەها سەركردەكانیش جەختیانكردەوە لەسەر پێویستی گەیشتن بەچارەسەرێكی دادپەروەرانە بۆ كێشەی نێوان فەڵەستین و ئیسرائیل لەسەر بنەمای دوو دەوڵەتی.
* سەركردەكان خواستی خۆیان نوێكردەوە لەسەر پەرەدان بەهاوكاری و تەواوكاری ناوچەیی و پرۆژە هاوبەشەكانی نێوان وڵاتەكانیان بەشێوەیەك كە بەشدار بێت لەهێنانەدی گەشەپێدانی بەردەوام.
* سەركردەكان ستایشی دەستپێشخەرییەكانی سعودیەی سەوزو رۆژهەڵاتی ناوەڕاستی سەوزیان كرد كە لەلایەن شازادەی جێنشینی سعودیەوە راگەیەنرا.
* سەركردەكان جەختیانكردەوە لەسەر گرنگی بەدەستهێنانی ئاسایشی وزەو سەقامگیری بازاڕی وزە.
* سەركردەكان سەركۆنەی توندی خۆیان بۆ  تیرۆر بەهەموو شێوەو دەركەوتەكانییەوە دووپاتكردەوە.
* سەركردەكان سەركۆنەی توندی خۆیان لەبارەی هێرشە تیرۆرستییەكان دووپاتكردەوە كەدەكرێنە سەر هاووڵاتییانی سڤیل و كەلوپەلی مەدەنی و دامەزراوەكانی وزە لەشانشینی سعودیەو  ئیماراتی عەرەبی یەكگرتوو.
* سەركردەكان پشتیوانی تەواوی خۆیان بۆ سەروەری و ئاسایش و سەقامگیری و گەشەسەندن و خۆشگوزەرانی عیراق و هەموو هەوڵەكانی لەبەگژداچوونەوەی تیرۆر نوێكردەوە.
* هەروەها سەركردەكان پێشوازییان لەئاگربەست لەیەمەن و پێكهێنانی ئەنجومەنی سەركردایەتی سەرۆك كۆمار كردو هیوای خۆیان دەربڕی بۆ چارەسەری سیاسی.
* سەركردەكان جەختیانكردەوە لەسەر پێویستی چڕكردنەوەی هەوڵەكان بۆ گەیشتن بەچارەسەری سیاسی قەیرانی سوریا.
* سەركردەكان پشتیوانی خۆیان بۆ سەروەری و ئاسایش و سەقامگیری و هەموو ئەو چاكسازییانەی كە پێویستن بۆ هێنانەدی بووژانەی لوبنان دەربڕی.
* سەركردەكانی پشتیوانی خۆیان بۆ ئەو هەوڵانە دەربڕی بۆ چارەسەری قەیرانی لیبیا بەپێی ئەو بڕیارانەی پەیوەندیدارن بە ئەنجومەنی ئاسایشەوە.
* سەركردەكانی بەشدار لەلوتكەی جدە جەختیانكردەوە لەسەر پشتیوانیكردن لەهەوڵەكان بۆ هێنانەدی سەقامگیری لەسودان و تەواوكردن و سەرخستنی قۆناغی راگوزەرو هاندانی لایەنەكانی سودان بۆ گەیشتن بەسازان.
* سەبارەت بە بەنداوی نەهزە لەئەسیوپیا، سەركردەكان پشتیوانی خۆیان بۆ ئاسایشی ئاوی میسر دەربڕی، هەروەها بۆ چارەسەرێكی دیپلۆماسی كەبەرژەوەندی هەموو لایەنەكان بەدیبهێنێت و بەشداربێت لەئاسایش و بووژاندنەوەی ناوچەكەدا.
* سەبارەت بە جەنگ لەئۆكرانیا، سەركردەكان دووپاتیانكردەوە كە پێویستە رێز لەپرەنسیپەكانی یاسای نێودەوڵەتی بگیرێت لەنێویشیاندا پەیماننامەی نەتەوە یەكگرتووەكان و سەروەری و یەكپارچەیی خاكی وڵاتان و پابەندبوون بە بەكارنەهێنانی هێزو هەڕەشەكردن، سەركردەكانی بەشداربووی لوتكە داوا لەكۆمەڵگەی نێودەوڵەتی و سەرجەم وڵاتان دەكەن هەوڵەكانیان زیاتر بكەن بۆ گەیشتن بەچارەسەری سیاسی و كۆتایهێنان بەئێشوئازارە مرۆییەكان و پاڵپشتیكردن لەپەنابەرو ئاوارەكان و هەموو ئەوانەی بەهۆی شەڕەكەوە زیانیان پێگەیشتووەو ئاسانكاری بۆ هەناردەكردنی دانەوێڵە و مادە خۆراكییەكان و پشیتوانیكردن لەئاسایشی خۆراك بۆ وڵاتانی زیانلێكەوتووان بكەن.
* سەبارەت بە پرسی ئەفغانستانیش، سەركردەكان جەختیانكردەوە لەسەر گرنگی بەردەوامی و چڕكردنەوەی هەوڵەكان لەپێناوی پشتیوانیكردن لەگەیشتن بەهاوكارییە مرۆییەكان بۆ ئەفغانستان و هەستكردن بەمەترسی تیرۆرستان لەو وڵاتەو هەوڵەكان بۆئەوەی گەلی ئەفغانستان بەسەرجەم رەوتەكانییەوە بەماف و ئازادییە بنچینەییەكانیان بگەن بەتایبەتیش لەبوارەكانی خوێندن و تەندروستیدا.
* سەركردەكان كۆبوەوە لەلوتكەی جدە پێشوازییان لەئامادەكارییەكانی قەتەر كرد بۆ میوانداریكردن لە مۆندیالی جیهانی ساڵی 2022 و هەموو پشتیوانییەكیان بۆ سەرخستنی نوێكردەوە.
* سەركردەكان پابەندی خۆیان دووپاتكردەوە لەسەر بەستنی كۆبوونەوەكەیان لەداهاتوودا.
PUKmedia تایبەت