كاتی سەردانەكەی سەرۆكی ئەمریكا بۆ سعودیە رادەگەیەنرێت

ئەمڕۆ سێ شەممە سعودیە رایگەیاند، كە جۆو بایدن سەرۆكی ئەمریكا لەسەر بانگهێشتی شا سەلمان بن عەبدولعەزیز پادشای سعودیە بەنیازە رۆژانی 15و 16 ی مانگی تەموزی 2022 سەردانی ریاز بكات.

بەگوێرەی راگەیەنراوی دیوانی پادشایی كە ئاژانسی هەواڵەكانی سعودیە بڵاویكردۆتەوە: باس لەوەشكراوە كە جۆ بایدن سەرۆكی ئەمریكا لەسەر بانگهێشتی شا سەلمان عەبدولعەزیز ئال سعود پادشای سعودیە رۆژانی 15و 16ی تەموزی داهاتوو سەردانی ریاز دەكات، مەبەستی سەردانەكەش پتەوكردنی پەیوەندییە مێژووییە دوولایەنەكان و هاوبەشی ستراتیژی نێوان هەردوو وڵاتی سعودیەو ئەمریكاو پەرۆشی هەر دوو وڵات لەپێشخستنی ئەو پەیوەندییانە لەسەرجەم سێكتەرەكاندا.

بەگوێرەی راگەیەنراوەكە: بایدن لەكاتی سەردانەكەیدا چاوی بە شا سەلمان بن عەبدولعەزیز ئال سعود و شازادە موحەمەد بن سەلمان بن عەبدولعەزیز جێنشینی وڵات و جێگری ئەنجومەنی وەزیران دەكەوێت و گفتوگۆ لەبارەی هاریكارییەكانی نێوان هەردوو وڵات و ئەو ئاڵنگارییانە دەكرێت كە رووبەڕووی ناوچەكەو جیهان دەبنەوە.

بەپێی خشتەی سەردانەكە، سەرۆكی ئەمریكا لەدووەم رۆژی سەردانەكەیدا بۆ وڵاتی سعودیە ئامادەی لوتكەی هاوبەش دەبێت كەلەلایەن پادشای سعودیەوە بانگهێشتی بۆ كراوە و بەئامادەبوونی سەرانی وڵاتانی ئەنجومەنی هاریكاری كەنداوو پادشای ئۆردن و سەرۆكی میسر و سەرۆك وەزیرانی عیراق لەڕۆژی 16 تەمووزی ساڵی 2022.

PUKmedia ئاژانسەكان