ته‌ندروستی تاوتوێی هه‌ڵگرتنی كۆتوبه‌نده‌كانی كۆرۆنا ده‌كات

وه‌زاره‌تی ته‌ندروستی فیدڕاڵ ئاشكرایكرد كه‌ لێكۆڵینه‌وه‌یان كردووه‌ له‌باره‌ی هه‌ڵگرتنی كۆتوبه‌نده‌كان كه‌ له‌دژی په‌تای كۆرۆنا گیرابوونه‌به‌رو به‌نیازیشن به‌منزیكانه‌ لێكۆڵینه‌وه‌كه‌ بۆ لیژنه‌ی باڵای ته‌ندروستی و سه‌لامه‌تی نیشتمانی به‌رزبكه‌نه‌وه‌.

له‌و باره‌یه‌شه‌وه‌، ریاز عه‌بدولئه‌میر به‌ڕێوه‌به‌ری ته‌ندروستی گشتی له‌وه‌زاره‌تی ته‌ندروستی فیدڕاڵ به‌ئاژانسی هه‌واڵه‌كانی عیراقی رایگه‌یاندووه‌، ئه‌و كۆتوبه‌ندانه‌ی ماون و تایبه‌تن به‌ په‌تای كۆرۆنا له‌عیراق یه‌كجار سووك بوون و ئاماژه‌شی به‌وه‌دا له‌ئێستادا له‌تاوتوێكردنی ئه‌وه‌دان ئه‌و كۆتوبه‌ندانه‌ی ماون له‌رۆژانی داهاتوودا هه‌ڵبگیرێن.

راشیگه‌یاند: ده‌بێت هه‌ڵگرتنی ئه‌و كۆتوبه‌ندانه‌ش له‌كۆبوونه‌وه‌ی لیژنه‌ی باڵای ته‌ندروستی و سه‌لامه‌تی نیشتمانییه‌وه‌ رابگه‌یه‌نرێت.

وه‌زاره‌تی ته‌ندروستی و ژینگه‌ی فیدڕاڵ كه‌ رۆژانه‌ دۆخی په‌تای كۆرۆنا ده‌خاته‌ڕوو، رایگه‌یاندبوو كه‌ تێكڕای توشبوون به‌كۆرۆنا له‌چه‌ند رۆژی رابردوودا له‌ 100 كه‌س كه‌متر بووه‌.

 PUKmedia ئاژانسی هه‌واڵه‌كانی عیراق