}

خاچی سوور له‌سه‌ر كۆچبه‌رانی سنووری بیلاڕوسیا دێته‌ ده‌نگ

جیهان 07:26 PM - 2021-11-22

په‌یامی هاوبه‌شی فیدراسیۆنی نێونه‌ته‌وه‌یی خاچی سوور و مانگی سوور و كۆمیته‌ی نێونه‌ته‌وه‌یی خاچی سوور له‌باره‌ی قه‌یرانی كۆچبه‌رانی سن،وری نێوان وڵاتانی بیلاڕوسیا، پۆڵه‌ندا و لیتوانیا و وڵاتانی دیكه‌.

گه‌یشتنی بێ له‌مپه‌ڕ و سه‌لامه‌ت به‌ هاوكاری مرۆیی پێویستیه‌كی به‌په‌له‌یه‌  بۆ پاراستنی ژیان و كه‌مكردنه‌وه‌ی ئازار و مه‌ینه‌تیه‌كان.

فیدراسیۆنی نێونه‌ته‌وه‌یی خاچی سوور و مانگی سوور و كۆمیته‌ی نێونه‌ته‌وه‌یی خاچی سوور له‌ نزیكه‌وه‌ هۆشداری ئه‌و بارودۆخه‌ مرۆییه‌ كاره‌ساتباره‌ن كه‌ له‌ سه‌ر سنوری نێوان بێلاڕوسیا، پۆڵه‌ندا و لیتوانیا ده‌گوزه‌رێت. لانی كه‌م 10 كه‌س ژیانیان له‌ده‌ست داوه‌، له‌ نێویاندا‌ لاوێكی ته‌مه‌ن 14 ساڵ كه‌ به‌ هۆی سه‌رماوه‌ ره‌قبوه‌ته‌وه‌. بارودۆخه‌كه‌ رۆژبه‌ڕۆژ خراپتر ده‌بێت له‌گه‌ڵ نزیكبونه‌وه‌ی سه‌رما و سۆڵی زستانێكی ‌دژوار.

فیدراسیۆنی نێونه‌ته‌وه‌یی خاچی سوور و مانگی سوور پتر له‌ یه‌ك ملیۆن فرانكی سویسری ته‌رخان كردووه‌ بۆ كۆمه‌ڵه‌ی خاچی سووری بیلاڕوسیا، كۆمه‌ڵه‌ی خاچی سووری پۆڵه‌ندا و كۆمه‌ڵه‌ی خاچی سووری لیتوانیا، كه‌ خۆبه‌خش و كارمه‌ندانیان كۆمه‌كی هه‌زاران كه‌سی لێقه‌وماو ده‌كه‌ن به‌ خۆراك، ئاو، په‌تۆ و كۆمه‌كی پزیشكی پێویست. كۆمیته‌ی نێونه‌ته‌وه‌یی خاچی سوور  ئه‌م كۆمه‌كانه‌‌ ته‌واوده‌كات به‌ هاوكاریكردن له‌ دابینكردنی پشتگیری  و شاره‌زایی ته‌كنیكی زێده‌تر له‌گه‌ڵ هاوبه‌شه‌كانی دیكه‌ی خاچی سوور، به‌تایبه‌تی بۆ‌ هێشتنه‌وه‌ی په‌یوه‌ندی له‌ نێوان كۆچبه‌ران و كه‌سه‌ نزیكه‌كانیان و پرسه‌كانی دیكه‌ی پارێزگاری كردن.

بریجێت ئیبیسین، به‌رپرسی هه‌رێمایه‌تی فیدراسیۆنی نێونه‌ته‌وه‌یی خاچی سوور و مانگی سوور له‌ ئه‌وروپا ده‌ڵێت: "خه‌ڵكانێكی زۆر لێقه‌وماو ‌له‌سه‌ر سنوره‌كانن ، كه‌ كه‌سانی خاوه‌ن پێداویستی تایبه‌تیان تێدایه‌، ژنانی دووگیان،‌ هه‌روه‌ها سه‌دان منداڵ – كه‌ زۆرینه‌یان به‌بێ باوانیان یان ئه‌ندامێكی خێزانیان ماونه‌وه‌ته‌وه‌. ئه‌مانه‌ چه‌نده‌ها شه‌وه‌ له‌نێو‌ بارێكی دژواری سه‌رمادا ده‌خه‌ون. خۆبه‌خشه‌كانمان توانیان هه‌ندێ كۆمه‌كی مرۆیی بگه‌یه‌نن، ‌ به‌ڵام زۆریان ‌هێشتا‌ برسی و سه‌رمایانه‌. ئه‌مانه‌ دایكان، خوشكان و كوڕان و كیژانن، كه‌ژیانیان گرنگه‌ و‌ ده‌بێت بپارێزرێن و به‌ سۆزو كه‌رامه‌ته‌وه‌ ره‌فتاریان له‌گه‌ڵدا بكرێن".

مارتن شوێپ، به‌رپرسی هه‌رێمایه‌تی كۆمیته‌ی نێونه‌ته‌وه‌یی خاچی سوور و مانگی سووری ئه‌وروپا ده‌ڵێت: " بۆ پارێزگاری كردنی ژیانی ئه‌و كه‌سانه‌، ته‌ندروستی و كه‌رامه‌تیان، هه‌روه‌ها كه‌مكردنه‌وه‌ی ژان و ئازاریان و رێگریكردن له‌ كاره‌ساتی زێده‌تر، ته‌واوی هاوبه‌شه‌كانی بزوتنه‌وه‌ی خاچی سوور و مانگی سوور له‌گه‌ڵ رێكخراوه‌ مرۆییه‌كانی دیكه‌ پێوێستیان به‌ گه‌یشتنی په‌له‌ و بێ كۆسپ و ته‌گه‌ره‌یه‌ به‌ ته‌واوی كۆچبه‌ران به‌وانه‌ی سه‌ر سنووریشه‌وه‌. كۆمیته‌ی نێونه‌ته‌وه‌یی خاچی سوور پشتگیری وشاره‌زایی ته‌كنیكی زێده‌تر پێشكه‌شی هاوبه‌شه‌كانی خاچی سوور ده‌كات، به‌ مه‌به‌ستی یه‌كخستنه‌وه‌ی ئه‌و كه‌سانه‌ی كه‌ له‌ خێزانه‌كانیان دابڕاون و پرسه‌كانی دیكه‌ی  په‌یوه‌ست به‌ پارێزگاری كردنیانه‌وه‌. 
ته‌واوی كۆچبه‌ران، بێ گوێدان به‌ پێگه‌ی یاساییان، ده‌بێت به‌ته‌واوی ده‌ستیان بگات به‌ كۆمه‌كی مرۆیی و پزیشكی  وپێویسته‌ پارێزراوبن. گه‌ر پارێزگاری كردنی نێونه‌ته‌وه‌یی بێت‌، یان گه‌ڕانه‌وه‌ی خۆویست بۆ وڵاتی خۆیان، ده‌بێت له‌هه‌مو كاتێكدا مافی  كۆچبه‌ران رێزیان لێ بگیرێت و ده‌سه‌ڵاته‌كانیش ده‌بێت خۆیان به‌دوورخه‌ن له‌ په‌رته‌وازه‌كردنی ئه‌ندامانی خێزانان  و مه‌ترسی خستنه‌‌ سه‌ر‌كه‌رامه‌ت و ژیانیان.

 PUKmedia رێكخراوی خاچی سوری نێوده‌وڵه‌تی

ئەمانەش ببینە

زۆرترین خوێنراو

هەواڵەکان دەنێرین بۆ مۆبایلەکانتان

ئەپڵیکەیشنی

دابەزێنە

The News In Your Pocket